महाराष्ट्र संवाद न्यूज
भारतीय जनता पक्षाच्या सरकारने सार्वजनिक उद्योग विक्रीस काढले आहे. कामगार विरोधी धोरण राबवत असताना सरकारच्या भांडवलदारधार्जिने धोरणामुळे कामगारांनी यापुढील काळात संघर्ष आणि त्यागाची तयारी ठेवली पाहिजेत, असे प्रतिपादन भारतीय कम्युनिस्ट पक्षाचे राष्ट्रीय सचिव कॉम्रेड डॉ. भालचंद्र कांगो यांनी केले.
संगमनेर तालुका तंबाखू कामगार युनियन व भारतीय कम्युनिस्ट पक्ष यांच्यावतीने संगमनेर तालुक्यातील पेमगिरी येथे कामगार कार्यकर्ता प्रशिक्षण शिबीर १० व ११ डिसेंबरला पार पडले. कांगो यांच्या हस्ते शिबिराचे उद्घाटन झाले. कामगार व शेतकरी यांचे प्रतिक असलेल्या लाल झेंड्याचे ध्वजारोहण करत मानवंदना देण्यात आली. तसेच कॉ. सहाणे मास्तर यांच्या प्रतिमेस पुष्पहार अर्पण करत दिप प्रज्वलन करून अभिवादन करण्यात आले. यावेळी व्यासपिठावर युनियनचे अध्यक्ष कॉ. माधव नेहे, सरचिटणीस कॉ. ॲड. ज्ञानदेव सहाणे, डॉ. राधेश्याम गुंजाळ, पक्षाचे तालुका सचीव कॉ. प्रताप सहाणे, विडी कामगार नेते कॉ. कारभारी उगले, कॉ. शांताराम वाळुंज, तंबाखु युनियनचे पदाधिकारी, कामगार सोसायटीचे अध्यक्ष पाथर्डी येथील तंबाखु उद्योगातील कामगार कार्यकर्ते, फॉरेस्ट वाहतूकदार संघटनेचे कार्यकर्ते आदी उपस्थित होते.
यावेळी काॅ. युगल रायलु, काॅं. राम बाहेती, राज्य महिला फेडरेशन अध्यक्षा काॅं. स्मिता पानसरे, काॅं. सुभाष लांडे, भाकप जिल्हा सचिव काॅं. बन्सी सातपुते यांनी दोन दिवसीय सत्रात कामगार कार्यकर्त्यांना मार्गदर्शन केले.
कांगो म्हणाले, केवळ आपल्या आर्थिक प्रश्नांपुरते बघण्याची भूमिका सोडून द्यावे लागेल. संघटनेचे सभासद झाले म्हणजे आपले काम झाले ही वृत्ती बदलावी लागेल. कायम कामगार व कंत्राटी कामगार यामध्ये संघर्ष सुरू झाला आहे.
कॉ. युगल रायलु यांनी संघटनात्मक दृष्टिकोनातून ‘शिका, संघटित व्हा व संघर्ष करा’ या डॉ. बाबासाहेब आंबेडकर यांच्या विचारावर विचार मंथन करत कामगार संघटना व कार्यकर्त्यांना मार्गदर्शन केले. डॉ. राम बाहेती यांनी कामगार कायदा संदर्भात भाजप सरकारच्या धोरणाविषयी माहिती दिली.
स्मिता पानसरे यांनी औद्योगिक क्षेत्रात आणि समाज जीवनात महिलांचे स्थान दुय्यम असल्याचे सांगत समानतेवर भाष्य केले.
प्रास्ताविक कॉ. माधव नेहे यांनी, उपस्थितांचे स्वागत ॲड. ज्ञानदेव सहाणे यांनी केले.
