महाराष्ट्र संवाद न्यूज नेटवर्क
संगमनेर : नववर्षाच्या स्वागतासाठी ३१ डिसेंबरच्या रात्री लेजंड एंटरटेनमेंटच्या वतीने आयोजित करण्यात आलेला कार्यक्रम रद्द करण्याची मागणी सकल हिंदू समाजाच्यावतीने करण्यात आल्यानंतर तो रद्द करण्याची आफत संयोजकांवर ओढवली आहे.
नाशिक-पुणे महामार्गालगत असलेल्या मालपाणी लॉन्स येथे लेजंड एंटरटेनमेंट या ग्रुपने नववर्ष स्वागतासाठी ३१ डिसेंबरच्या रात्रीच्या युवक-युवतींना इंस्टाग्रामवरील स्टारचे आकर्षण दाखवून व युवकांना २०० रुपये फी आकारून महिला-युवतींना विनामूल्य प्रवेश देत या कार्यक्रमाचे नियोजन केले होते. मात्र या कार्यक्रमासाठी आवश्यक असणाऱ्या परवानग्या संबंधित विभागाकडून घेतल्या नसल्याचा तसेच सदर कार्यक्रमाची तिकीट विक्री महाविद्यालयात जाऊन युवक-युवतींना पाश्चात्य संस्कृतीचे आकर्षण दाखवून केली जात असल्याचा आक्षेप घेत या कार्यक्रमाला परवानगी नाकारण्याची मागणी सकल हिंदू समाजाच्यावतीने एका निवेदनाद्वारे पोलीस निरीक्षक व तहसीलदारांकडे करण्यात आली होती.
पाश्चात्य संस्कृतीचे अंधानुकरण करत असताना मूळ आर्य व भारतीय संस्कृती मूल्यांचे अपपालन सदर इव्हेंट करताना करता येणार नाही. शासकीय रिपोर्ट पाहता भारतातील मोठ्या महानगरांमध्ये तसेच मुंबई, पुणे, नाशिक येथील रेव्ह पार्टी व इव्हेंट पार्ट्यांवर झालेल्या धाडीनंतर वेगवेगळे अंमली पदार्थ तस्करी करणारे लोक पडद्यामागून अशा इव्हेंटचे आयोजन करत असतात. असे निष्पन्न होत आहे सदर इव्हेंटचे त्या दृष्टीनेदेखील सखोल चौकशी करण्याची मागणी हिंदू समाजाच्यावतीने करण्यात आली होती.
कार्यक्रम रद्द करत असल्याचे संयोजकांचे पत्र
सदर कार्यक्रमास सकल हिंदू समाज व राष्ट्रप्रेमी समाजसेवी संघटनांचा होणारा तीव्र विरोध पाहता संगमनेर शहराचे वातावरण खराब होऊ द्यायचे नसल्याने मालपाणी लॉन्स येथे होणारा लाईव्ह म्युझिक कोन्सर्ट हा कार्यक्रम रद्द करत असल्याचे लेजंट इंटरटेनमेंट म्युझिक अँड फिल्म प्रॉडक्शनच्यावतीने लेखी पत्र संगमनेर शहर पोलिस निरीक्षक यांना देण्यात आले आहे.
