महाराष्ट्र संवाद न्यूज नेटवर्क
अहमदनगर : स्नेहालय संचलित रेडिओ नगर ९०.४ एफएमचा १३ जानेवारीला१२ वा वर्धापन दिन साजरा होत आहे. त्या निमित्ताने रेडिओ उद्धघोषक स्पर्धा (RJ कॉन्टेस्ट) आयोजित करण्यात आल्याची माहिती देण्यात आली आहे.
तीन गटांमध्ये या स्पर्धेचे आयोजन करण्यात आले आहे. इच्छुकांनी अधिक माहितीसाठी ९०११११२३९० या मोबाईल क्रमांकावर संपर्क करावयाचा आहे. स्पर्धकांना रेडिओ नगर केंद्रावर आल्यानंतर दोन ते तीन मिनिटात स्क्रिप्टचे वाचन सादर करावयाचे आहे.
स्पर्धेचा निकाल १३ जानेवारी २०२३ रोजी सकाळी ११ वाजता जाहीर केला जाणार असून विजेत्या स्पर्धकांना सन्मानचिन्ह आणि प्रमाणपत्र देण्यात येईल. तसेच सर्व सहभागी स्पर्धकांना प्रमाणपत्र देण्यात येईल. विजेत्यांसाठी रेडिओवर स्पेशल शो आयोजित करण्यात येईल. त्या विजेत्या स्पर्धकाला RJ म्हणून रेडीओवर शो करता येणार असून या स्पर्धेसाठी कोणतेही शुल्क आकारले जाणार नसल्याची माहिती देण्यात आली.
स्पर्धा ही तीन गटात घेतली जाणार असून पहिला गट स्नेहालय कर्मचाऱ्यांसाठी व दुसरा गट स्नेहालयातील पंधरा वर्षाखालील विद्यार्थी व विद्यार्थिनी साठी असून तिसरा गट खुला गट आहे. स्पर्धेत भाग घेऊ इच्छिणाऱ्यांकरिता दहा विषय असतील. त्यात १. स्वातंत्र्याची पंच्याहत्तरी, २. सिनेमा: आजचा, कालचा आणि उद्याचा, ३. वेबसिरिजची दुनिया, ४. ऐतिहासिक नगर शहर, ५. स्त्री म्हणून वेगळं जगायचंय मला, ६. आणखी किती निर्भया?, ७. आनंदाचा टोल फ्री क्रमांक: मित्र, ८. संविधान रक्षण काळाची गरज., ९. मराठी चित्रपट सृष्टीचे बदलते अंतरंग, १०. सोशल मीडियात गुरफटलेली आजची तरुणाई, ११. कोणतीही ताजी घडामोड / घटना हे विषय ठेवण्यात आले आहेत.
स्पर्धकांनी वरीलपैकी कुठल्याही विषयांवर स्क्रिप्ट म्हणजे लेखन करायचे आहे व ती स्क्रिप्ट रेडिओ नगर 90.4 एफएम, प्रतिसाद केंद्र बालिकाश्रम रोड लेंडकर मळा या ठिकाणी स्पर्धेच्या दिवशी घेऊन येणे गरजेचे आहे. स्क्रिप्ट स्वलिखित असणे गरजेचे आहे. ही स्पर्धा दिनांक ११ व १२ जानेवारी २०२३ रोजी सकाळी १० ते ६ या वेळेत पार पडेल. स्पर्धकांना १० जानेवारी रोजी स्पर्धेची वेळ फोनद्वारे कळवली जाणार आहे.
