महाराष्ट्र संवाद न्यूज नेटवर्क
संगमनेर : काँग्रेस विधिमंडळ पक्ष नेते आमदार बाळासाहेब थोरात मागील वर्षी अंगणवाडी, प्राथमिक शाळा खोल्या विविध रस्ते यांसह विविध विकास कामांच्या केलेल्या मागणीतून व पाठपुराव्यातून जिल्हा विकास नियोजनमधून या कामांना ६ कोटी ८० लाख रुपयांचा निधी मंजूर झाला असल्याची माहिती देण्यात आली आहे.
तत्कालीन सरकारमध्ये मंत्री असलेल्या थोरात यांनी महाविकास आघाडी सरकारच्या काळात नगर जिल्ह्याला वरदान ठरलेल्या निळवंडे धरणाच्या कालव्यासाठी मोठा निधी उपलब्ध करून घेत ही कामे रात्रंदिवस सुरू ठेवली होती. याचबरोबर तालुक्यातील रस्ते, अंगणवाडी, प्राथमिक शाळा खोल्या व विविध विकास कामांसाठी देखील मोठ्या निधीची मागणी केली होती. मात्र सत्ता बदल झाला आणि अनेक विकास कामांना स्थगिती मिळाली.
स्थानिक लोकप्रतिनिधी यांनी सुचवलेल्या व पाठपुरावा केलेल्या विविध विकास कामांना जिल्हा नियोजन समितीने नुकतीच मंजुरी दिली असून या अंतर्गत संगमनेर तालुक्यातील कवठे धांदरफळ, वेल्हाळे, पिंपळगाव माथा, निळवंडे येथे अंगणवाडी खोल्या उभारण्यात येणार आहेत. या खोल्यांसाठी ४५ लाख रुपये, जनसुविधा योजनेअंतर्गत पेविंग ब्लॉक बसवणे, दशक्रिया विधी घाटाचे सुशोभीकरण, पिण्याच्या पाण्याचे फिल्टर बसवणे, सोलर लॅम्प बसवणे व इतर सुशोभीकरण कामासाठी ५६ लाख रुपयांचा निधी मिळाला आहे.
तर जिल्हा परिषद प्राथमिक शाळेच्या खोल्या जांभुळवाडी,तळेगाव, शेळकेवाडी, कसबावाडी, पोखरी हवेली, साकुर आणि राजापूर येथे बांधण्यात येणार आहे. त्यासाठी १ कोटी रुपये निधी मंजूर झाला आहे. याच बरोबर नागरी सुविधांमधून चंदनापुरी येथील साईबाबा मंदिर परिसर स्वच्छतागृह अनुग्रह बांधण्यासाठी १२ लाख रुपये व साकुर येथील सार्वजनिक ठिकाणी दिवाबत्ती करण्यासाठी ७ लाख रुपयांचा निधी मिळाला आहे. याचबरोबर क वर्ग तीर्थक्षेत्रांकरता १ कोटी ५ लाख रुपये आणि संगमनेर तालुक्यातील विविध रस्ते मजबुतीकरण व डांबरीकरण कामांसाठी ३ कोटी १० लाख रुपयांचा निधी असे एकूण ६ कोटी ८० लाख रुपयांचा निधी मिळाला आहे.
याचबरोबर जनसुविधा योजनेअंतर्गत मेंगाळवाडी, निमगाव खुर्द, सावरगाव तळ, निमोन, निळवंडे, चिंचोली गुरव, आंबी खालसा, सावरगाव घुले, पोखरी बाळेश्वर, जवळे बाळेश्वर, वडगाव लांडगा, चिकणी, गुंजाळवाडी, वेल्हाळे, कासारा दुमाला, डोळासने, खंडेरायवाडी या ठिकाणी सुशोभीकरण करण्यात येणार आहे. विविध गावांमध्ये होणाऱ्या या विकास कामांच्या निधी करता आमदार थोरात यांनी सातत्याने पाठपुरावा केला असून त्यांच्या माध्यमातून हा निधी उपलब्ध झाला आहे. रस्ते डांबरीकरण व मजबुतीकरणासह विविध कामांचा समावेश असलेली ही कामे लवकरात लवकर सुरू होणार असल्याची माहिती इंद्रजीत थोरात यांनी दिली.
