महाराष्ट्र संवाद न्यूज नेटवर्क
संगमनेर : नात्याला काळीमा फासत आपल्याच नात्यात असलेल्या सोळा वर्ष वयाच्या अल्पवयीन मुलीवर अत्याचार केल्याप्रकरणी जिल्हा व सत्र न्यायालयाने आरोपीला दहा वर्ष सश्रम कारावास आणि तीस हजार रुपये दंड, दंड न भरल्यास एक वर्ष कारावासाची शिक्षा ठोठावली आहे.
छबन मच्छिंद्र खेमनर असे शिक्षा झालेल्या आरोपीचे नाव असून त्याच्या विरोधात संगमनेर येथील जिल्हा व सत्र न्यायालयात न्यायाधीश वाय. पी. मनाठकर यांच्या समोर खटला सुरू होता. न्यायाधीश मनाठकर यांनी मंगळवारी या खटल्याचा निवाडा केला.
छबन खेमनर याने आपल्याच नात्यातील सोळा वर्ष वय असलेल्या मुलीच्या घरी जात कोथिंबीर आणण्यासाठी आजच्या दिवस आमच्या शेतात चल. असे पीडित मुलीला आणि तिच्या आई-वडिलांना सांगून तिला आपल्या मोटर सायकलवर बसवून पठार भागातील जांभूळवाडी शिवारातील केटीवेअर जवळ असलेल्या वनविभागाच्या जंगलात नेले. तेथे त्याने या मुलीवर अत्याचार केले. घडलेला प्रकार कोणाला सांगितला तर जीवे मारून टाकेल अशी धमकी पीडितेला दिली. त्यानंतर आरोपीने तिला पुन्हा तिच्या घरी नेऊन सोडले.
पीडित मुलीने घडलेला प्रकार घरी आपल्या आई-वडिलांना सांगितल्यानंतर या संदर्भात संगमनेर तालुक्यातील घारगाव पोलीस ठाण्यात आरोपी छबन खेमनर याच्या विरोधात पिडीतेने दिलेल्या तक्रारीवरून बाल लैंगिक अत्याचाराचा गुन्हा नोंदविण्यात आला. तत्कालीन पोलीस निरीक्षक दिलीप निघोट यांनी याप्रकरणी तपास करत संगमनेरच्या जिल्हा व सत्र न्यायालयात आरोपी विरोधात दोषारोपपत्र दाखल केले होते.
न्यायाधीश वाय. पी. मनाठकर यांच्यासमोर या खटल्याची सुनावणी झाली. खटल्यात एकूण आठ साक्षीदार सरकार पक्षाने तपासले. दोन्ही बाजूचा युक्तिवाद ऐकल्यानंतर न्यायाधीश मनाठकर यांनी आरोपी छबन खेमनर याला दोषी ठरवत अत्याचार प्रकरणी १० वर्ष सश्रम कारावास आणि तीस हजार रुपये दंड, दंड न भरल्यास एक वर्ष कारावास, पोक्सो कलम चार अन्वये १० वर्ष सश्रम कारावास आणि दंडाच्या रकमेतील वीस हजार रुपये पीडितेला देण्याचे आदेश दिले. या खटल्याकडे पठार भागातील ग्रामस्थांचे लक्ष लागले होते.
