घराचे छत अंगावर पडून चुलत्या-पुतणीचा मृत्यू; वृद्ध महिला गंभीर जखमी

महाराष्ट्र संवाद न्यूज नेटवर्क
रात्रीच्या वेळी घराच्या पडवीमध्ये जेवण करत असताना घराचे छत अंगावर पडल्याने चुलत्याचा व पुतणीचा मृत्यू झाला आहे. याशिवाय वृद्ध महिला गंभीर जखमी झाले असून तिच्यावर रुग्णालयात उच्चार सुरू असल्याची माहिती देण्यात आली.
संगमनेर तालुक्यातील वेल्हाळे येथे शुक्रवारी रात्री साडेआठ वाजण्याच्या दरम्यान ही दुर्दैवी घटना घडली. लक्ष्मण चंद्रभान सोनवणे (वय 42 वर्ष) व सानिका एकनाथ सोनवणे (वय 8 वर्ष) असे मृत झालेल्या चुलत्या-पुतणीचे नाव आहे. तर मृत लक्ष्मण सोनवणे यांची आई वैजयंतीबाई चंद्रकांत सोनवणे (वय 65 वर्ष) या जखमी झाल्या आहेत. त्यांच्यावर उपचार सुरू आहेत.वेल्हाळे येथे शुक्रवारी रात्री सोनवणे कुटुंबीय आपल्या बंगल्याशेजारी असलेल्या पत्र्याच्या पडवीमध्ये रात्री जेवण करत होते. याचवेळी पत्र्यावर सुरक्षिततेसाठी बांधण्यात आलेली वरुंडी आणि बांधकाम पत्र्यावर पडल्याने पत्र्यासह ते सर्व या कुटुंबीयांच्या अंगावर पडले. अचानकपणे बांधकामाचे साहित्य अंगावर पडल्याने त्याखाली जेवण करणारे सोनवणे दांपत्य दबले गेले. यात लक्ष्मण सोनवणे आणि सविता सोनवणे यांचा मृत्यू झाला. स्थानिक नागरिकांनी तातडीने घटनास्थळी धाव घेऊन सर्वांना उपचारासाठी रुग्णालयात हलविले.
या घटनेची माहिती मिळताच संगमनेर शहर पोलीस ठाण्याचे पोलीस कर्मचारी विजय खाडे तातडीने घटनास्थळी दाखल झाले. या संदर्भात पुढील तपास ते करत आहेत.