तत्कालीन युती सरकारमधील शिवसेनेच्या माजी मंत्र्याविरुद्ध पुण्यात अत्याचाराचा गुन्हा

महाराष्ट्र संवाद न्यूज नेटवर्क
तत्कालीन भाजप-शिवसेना युती सरकारच्या काळात 1995 मध्ये सामाजिक न्याय आणि क्रीडा मंत्री पद भुषविणार्‍या शिवसेनेच्या उत्तम प्रकाश खंदारे यांच्यासह महादेव भोसले आणि आणखी एका महिलेवर अत्याचाराचा गुन्हा दाखल करण्यात आला आहे.
पुण्यातील बिबवेवाडी पोलिस ठाण्यात एका महिलेने दिलेल्या तक्रारीनुसार तिच्यावर पुण्यातील शासकीय विश्रामगृहात अत्याचार करण्यात आला आहे. लग्नाचे आमिष दाखवत व मुलांचा सांभाळ करण्याचे वचन देत वारंवार शारीरिक संबंध ठेवल्याचे 37 वर्षीय महिलेने आपल्या तक्रारीत म्हटले आहे.
2012 पासून बिबेवाडीतील बी रेस्ट हाउस, पोकळे वस्ती येथील जाधव निवास या ठिकाणी तिच्यावर अत्याचार करण्यात आल्याची तक्रार दाखल करण्यात आली असून याप्रकरणी भा.द.वि. 376, 377, 406, 420, 506 (2) आणि 34 कलमानुसार गुन्हा दाखल करण्यात आला आहे.
महिलेने तब्बल अकरा वर्षानंतर दाखल केलेल्या तक्रारीत म्हटले आहे की, चाकूचा धाक दाखवत तिच्यावर खंदारे यांच्याकडून वारंवार लैंगिक अत्याचार करण्यात आले. उत्तम खंदारे यांनी फिर्यादी महिलेला लग्नाचे आमिष दाखवून आणि तिच्या मुलांचा सांभाळ करतो असे म्हणत अनेकदा तिच्यासोबत नैसर्गिक आणि अनैसर्गिक संबंध ठेवले. त्यास विरोध केल्याने तिला मारहाण केल्याचे देखील या महिलेने आपल्या तक्रारीत म्हटले आहे.