महाराष्ट्र संवाद न्यूज
संगमनेर :
बहुचर्चित ठरलेल्या संगमनेरच्या अमृतवाहिनी अभियांत्रिकी महाविद्यालयातील विद्यार्थी संकेत नवले याच्या खून प्रकरणी पोलिसांनी पकडलेल्या दोन्ही आरोपींना संगमनेरच्या जिल्हा व सत्र न्यायालयाने बुधवारी जामीन मंजूर केला आहे. त्यामुळे संशयित आरोपींच्या सुटकेचा मार्ग मोकळा झाला असून संगमनेर पोलिसांना अद्यापही संकेतच्या मारेकऱ्यांना शोधण्यात यश आलेले नसल्याचे स्पष्ट झाले आहे.
अकोले येथील रहिवासी असलेला संकेत नवले हा विद्यार्थी संगमनेरच्या अमृतवाहिनी अभियांत्रिकी महाविद्यालयात शिक्षण घेत होता. ८ डिसेंबर २०२२ रोजी त्याचा मृतदेह शहरालगतच्या सुकेवाडी रस्त्यावर असलेल्या पुनर्वसन कॉलनी जवळील एका नाल्यात आढळून आला होता. अज्ञात व्यक्तीने अज्ञात करण्यासाठी त्याचा डोक्यात धारदार शस्त्राने वार करून खून करण्यात आल्याचे निष्पन्न झाले होते.
त्यामुळे संगमनेर शहर पोलिसांनी अज्ञात आरोपी विरोधात शहर पोलीस ठाण्यात संकेत नवले याच्या खून प्रकरणी खुनाचा गुन्हा दाखल केला होता. सदर गुन्ह्याचा तपास संगमनेर शहर पोलीस, पोलीस उपअधीक्षक, अप्पर पोलीस अधीक्षक, अकोले पोलीस ठाण्याच्या कर्मचाऱ्यांचे संयुक्त पथक करत होते. तब्बल दोन महिने जंग जंग पछाडूनही पोलिसांच्या हाती या गुन्ह्यात फारसे काही लागले नाही. पोलिसांना संकेतचे मारेकरी शोधण्यात अपयश येत असतानाच मयत संकेत नवले हा वापरत असलेल्या समलैंगिक संबंधाबाबतच्या मोबाईल ॲपच्या आधारे पोलिसांनी तपास करत सदर प्रमाणेच अन्य ॲप वापरत असलेल्या आणि शहरालगतच्या पुनर्वसन कॉलनीमध्ये राहणाऱ्या शाहरुख आणि सलमानकडे पोलिसांनी वारंवार चौकशी केली होती.
८ फेब्रुवारी २०२३ रोजी या दोघांना संगमनेर शहर पोलिसांनी संकेत नवले याच्या खून प्रकरणी अटक केली. त्यांच्याकडे तपास करत असताना पोलिसांना खुनाच्या अनुषंगाने कोणताही पुरावा आढळून आला नाही. दरम्यान आरोपींनी संगमनेरमधील वकील शरीफ पठाण यांच्यामार्फत संगमनेरच्या जिल्हा व सत्र न्यायालयात जामीन अर्ज दाखल केला होता. ॲड. पठाण यांनी न्यायालयासमोर पोलिसांच्या तपासा संदर्भात आणि कार्यपद्धतीबाबत विविध प्रश्न उपस्थित केले होते. तसेच आरोपी निर्दोष असण्याचा युक्तिवाद करताना चोर सोडून संन्याशाला फाशी अशा पद्धतीने पोलीस तपास असल्याचे म्हटले.
दोन्ही आरोपीं विरोधात असलेला पुरावा अत्यंत कमकुवत असल्याचे निरीक्षण नोंदवत जिल्हा व सत्र न्यायालयाचे न्यायाधीश प्रशांत कुलकर्णी यांनी दोन्ही आरोपींना जामीन मंजूर केला आहे. पोलीस तपासातील त्रुटींवर बोट ठेवत तसेच खून करणारे आरोपी शोधण्यात पोलिसांना अपयश आल्याचे न्यायालयाच्या निदर्शनास आणून दिल्याबद्दल आरोपींच्या नातेवाईकांनी ॲड. शरीफ पठाण व ॲड. मोहसीन खान यांचे आभार मानले आहे.
