महाराष्ट्र संवाद न्यूज
श्रीरामपूर :
अखिल भारतीय मराठी चित्रपट महामंडळाचा कवी श्रेष्ठ गीतकार ग दि माडगूळकर पुरस्कार श्रीरामपूर मधील कवी व चित्रपट गीतकार बाबासाहेब सौदागर यांना जाहीर झाला आहे. मुंबईमध्ये मान्यवरांच्या हस्ते या पुरस्काराचे वितरण केले जाणार आहे.
अखिल भारतीय मराठी चित्रपट निर्माता महामंडळाच्या वतीने यंदा प्रथमच कवी श्रेष्ठ गीतकार ग दि माडगूळकर यांच्या नावाने सर्वोत्कृष्ट गीतकार पुरस्कार जाहीर करण्यात आला आहे. अखिल भारतीय मराठी चित्रपट निर्माता महामंडळाचे अध्यक्ष देवेंद्र मोरे यांनी या पुरस्काराची गुरुवारी मुंबईमध्ये घोषणा केली.
कवी श्रेष्ठ माडगूळकर यांच्या नावाने सुरू करण्यात आलेल्या या पहिल्याच पुरस्कारासाठी श्रीरामपूर मधील गीतकार बाबासाहेब सौदागर यांची निवड करण्यात करण्यात आल्याने श्रीरामपूरच्या कलाक्षेत्रात मानाचा तुरा रोवला गेला आहे. कवी बाबासाहेब सौदागर यांनी 80 हून अधिक चित्रपट आणि 27 मालिकांसाठी गीत लेखन केले आहे. काही लोकप्रिय चित्रपटात देखील सौदागर यांनी मुख्य भूमिका केल्या.
राजमाता जिजाऊ, मी सिंधुताई सपकाळ, घुंगराच्या नादात, सत्ताधीश, झुंजार, झुंज, एकाकी, उमंग, शिवा, तुझा दुरावा, मध्यमवर्ग, सासरची का माहेरची, चंद्रभागा, लेक लाडकी, जुगाड या चित्रपटातील त्यांची गीते लोकप्रिय झाली आहेत. याशिवाय स्वराज्य रक्षक संभाजी, स्वराज्य जननी जिजामाता, आशा अभिलाषा, चिमणी पाखरं, बंदीशाळा या मालिकांमधील त्यांची गीते लोकप्रिय ठरली. सांजगंध, पिवळण, चित्ररंग हे कवितासंग्रह, चित्रपट गीतसंग्रह प्रकाशित झाले आहे. याशिवाय भंडारभुल ही कादंबरी पुणे विद्यापीठाच्या अभ्यासक्रमात होती.
पायपोळ हे मराठा समाजातील पहिले वास्तव चित्रण असलेले त्यांचे आत्मचरित्र देखील लोकप्रिय ठरले. घुंगराच्या नादात, सत्ताधीश, शिवा, तुझा दुरावा, गणगवळण या चित्रपटात त्यांनी महत्त्वपूर्ण भूमिका केल्या. या लेखन कार्याचा गौरव म्हणून सौदागर यांना हा पुरस्कार जाहीर करण्यात आल्याची माहिती महामंडळाचे अध्यक्ष देवेंद्र मोरे आणि कार्यकारी संचालक निर्माते संजय दीक्षित यांनी म्हटले आहे.
21 हजार रुपये रोख मानपत्र मानचिन्ह गौरव वस्त्र असे या पुरस्काराचे स्वरूप असून येत्या 11 मार्च रोजी मुंबईच्या दादर येथील यशवंतराव चव्हाण नाट्यगृहात मान्यवरांच्या हस्ते या पुरस्काराचे गीतकार बाबासाहेब सौदागर यांना वितरण केले जाणार आहे.
