महाराष्ट्र संवाद न्यूज
अमृतवाहिनी शेती व शिक्षण विकास संस्थेचे मुख्य कार्यकारी अधिकारी अनिल शिंदे यांचे सुपुत्र डॉ. सिद्धार्थ शिंदे यांनी ऑर्थोडोंटिक्स दंतरोग चिकित्सा विभागात केलेल्या अतुलनीय कामगिरीबद्दल त्यांना ऑस्ट्रेलियाचा तेज गोलंदाज ब्रेट ली यांच्या हस्ते ‘इंडिया ब्रँड आयकॉन अवॉर्ड 2022-23’ मिळाला आहे.
मुंबई येथे टाईम सायबर मीडियाच्यावतीने विविध क्षेत्रात उल्लेखनीय कामगिरी करणाऱ्या व्यक्तींचा इंडिया ब्रँड आयकॉन अवॉर्ड 2022-23 देऊन एका शानदार कार्यक्रमात ऑस्ट्रेलियाचा तेज गोलंदाज ब्रेट ली याच्यासह विविध क्रिकेटपटू व सिने क्षेत्रातील कलावंतांच्या उपस्थितीत सन्मान करण्यात आला.
डॉ. सिद्धार्थ शिंदे हे मागील 11 वर्षापासून पुणे येथे दंत सर्जन व विशेष सेवा म्हणून कार्यरत आहेत. ऑर्थोडोंटिस्ट म्हणून काम करताना त्यांनी केलेल्या विविध व वेड्या वाकड्या दातांच्या समस्या (smile designing) या क्षेत्रात संशोधनावर केलेले काम, लिहिलेले पुस्तक आणि सर्वसामान्य सेवा देण्याची पद्धती, याच्याबरोबर समाजकार्यात घेतलेला सहभाग या सर्व कामांमुळे त्यांचा एक्सलन्स इन क्लिनिकल ऑर्थोडोंटिक्स पुणे या मानाच्या पुरस्कार विभागात टाइम्स सायबर मेडिया ग्रुपने इंडिया ब्रँड आयकॉन अवॉर्ड 2022-23 देऊन सन्मान केला.
डॉ. सिद्धार्थ शिंदे हे अनिल शिंदे यांचे सुपुत्र असून शेतकरी कुटुंबातून आलेल्या डॉ. सिद्धार्थ यांनी पुणे येथील कर्नाटक हायस्कूल येथून शालेय शिक्षण घेतले तर एसएमबीटी दंत महाविद्यालय येथून बीडीएस पदवी व भारती विद्यापीठामधून एमडीएस सर्जन (ऑर्थोडोंटिक्स) हे पदव्युत्तर शिक्षण घेतले. गुणवत्ता व नाविन्यपूर्ण काम करण्याची पद्धत यामुळे त्यांनी अल्पावधीतच पुणेसारख्या शहरात आपला नावलौकिक मिळवला.
पुरस्काराबद्दल काँग्रेस विधिमंडळ पक्षनेते आमदार बाळासाहेब थोरात, माजी आमदार डॉ. सुधीर तांबे, आमदार सत्यजित तांबे, दुर्गाताई तांबे, इंद्रजीत थोरात, शरयुताई देशमुख, कॅन्सरतज्ञ डॉ. जयश्रीताई थोरात, चार्टर्ड अकाउंटंट डॉ. शिवाजीराव झावरे, अमृतवहिनी संस्थेचे मुख्य कार्यकारी अधिकारी अनिल शिंदे, सौ. स्वागत शिंदे, धवल शिंदे आदींसह विविध मान्यवरांनी अभिनंदन केले आहे.
