महाराष्ट्र संवाद न्यूज
अचानकपणे घराच्या उघड्या दरवाजातून आत आलेल्या बिबट्याने घरात टीव्ही पाहत असलेल्या 62 वर्षीय व्यक्तीवर हल्ला चढविला. अनपेक्षित झालेल्या बिबट्याच्या हल्ल्यात संगमनेर तालुक्यातील वडदरा (बोटा) येथील उत्तम बाळाजी कुऱ्हाडे यांचा मृत्यू झाला.
शनिवारी संगमनेर तालुक्यातील घारगाव नजीकच्या वडदरा बोटा येथे रात्री सव्वा आठ वाजण्याच्या सुमारास ही खळबळजनक घटना घडली. या प्रकाराने परिसरात भीतीचे वातावरण निर्माण झाले आहे. संगमनेर तालुक्यात मानवी वस्तीत बिबट्याचा वावर वाढला आहे. मानवी वस्तीत घुसलेले बिबटे मानवावर हल्ला करत आहेत.
रात्री आठ वाजण्याच्या सुमारास घराच्या उघड्या दरवाज्यातून आत आलेल्या बिबट्याने समोर टीव्ही पाहत असलेल्या उत्तम कुऱ्हाडे यांच्यावर त्यांना काही समजण्यापूर्वीच हल्ला चढविला. गंभीर जखमी झालेल्या कुऱ्हाडे यांचा जागेचा मृत्यू झाला. जखमी अवस्थेतील कुऱ्हाडे यांना बिबट्या फरफटत नेत असल्याचे त्यांच्या आईच्या लक्षात आले. त्यामुळे त्यांच्या आईने आरडाओरडा केल्याने बिबट्याने कुऱ्हाडे यांचा मृतदेह तेथे सोडून बाहेर धूम ठोकली.
आजूबाजूच्या नागरिकांनी घटनेची माहिती वनविभागाला कळविल्यानंतर वनरक्षक डी. बी. कोरडे, एस. पी. सातपुते, वनसेवक बाळासाहेब वैराळ, अनंथा काळे आदी घटनास्थळी आले. दरम्यान या प्रकाराने शेतकऱ्यांमध्ये घबराटीचे वातावरण निर्माण झाले आहे वनविभागाने या नरभक्षक बिबट्याला पकडण्याची मागणी परिसरातील शेतकऱ्यांनी केली.
