संगमनेर (महाराष्ट्र संवाद न्यूज)
राज्यात महाराष्ट्र दिनापासून मोठ्या थाटामाटात महसूल मंत्री राधाकृष्ण विखे पाटील यांनी नव्या वाळू धोरणाची अंमलबजावणी सुरू केली आहे. एकीकडे ही तयारी सुरू असतानाच दुसरीकडे मात्र महसूलमंत्र्यांचे खास लक्ष असलेल्या संगमनेरात मात्र नव्या धोरण लागू होण्यापूर्वीच जेसीबीद्वारे वाळू तस्करी होत असून मोठ्या प्रमाणात वाळू साठे तयार करण्यात आल्याचे महसूलच्या कारवाईत समोर आले आहे.
संगमनेरात विद्यमान महसूलमंत्र्यांनी वाळू तस्करांचे कंबरडे मोडल्याचे सांगितले जात असले तरी हा दावा महसूलनेच केलेल्या कारवाईमुळे खोटा ठरला आहे. संगमनेर तालुक्यातील खांडगाव येथे रविवारी संध्याकाळी ही कारवाई करण्यात आली आहे. कारवाई मध्ये महसूलच्या पथकाने पाठलाग करत जेसीबी ताब्यात घेतला तसेच काही अंतरावर पथकाला मोठ्या प्रमाणात वाळू साठा देखील केल्याच्या आढळून आल्याने सोमवारी या साठ्याच्या पंचनामाचे काम सुरू होते.
खांडगाव येथील प्रवरानदी पात्रात चेतन साकुरे हा जेसीबीच्या माध्यमातून अवैधरित्या वाळूचा उपसा करत असल्याची माहिती महसूल विभागाला कळविण्यात आली होती. त्यामुळे नायब तहसीलदार उमाकांत कडनोर यांच्यासह तलाठी रामदास मुळे, बाबासाहेब नरवडे, युवराजसिंग जारवाल माहिती मिळालेल्या ठिकाणी गेले असता, महसूलच्या अधिकाऱ्यांना बघून नदीपात्रातून चालकाने जेसीबीसह पळ काढला. मात्र महसूलच्या पथकाने पाठलाग करुन हा जेसीबी पकडला. पथकाने पकडून ताब्यात घेतलेला जेसीबी संगमनेरच्या पोलीस वसाहतीत लावण्यात आला.
दरम्यान या जेसीबीच्या सहाय्याने नदीपात्रातून मोठ्या प्रमाणात अवैध वाळू उपसा करून नदीपात्रालगतच एका ठिकाणी मोठा साठा करण्यात आला होता. सोमवारी या वाळूसाठ्याचा पंचनामा करण्याचे काम सुरू होते. दरम्यान या वाळू साठ्यातून मोठ्या प्रमाणात वाळू वाहतूक करण्यात आल्याचे पुढे येत आहे. याप्रकरणी महसूल विभागाकडून आणि राज्याच्या महसूलमंत्र्यांकडून कोणत्या प्रकारची कारवाई केली जाते, याकडे लक्ष लागले आहे.
दरम्यान बंदी आदेश डावलून जेसीबीद्वारे वाळूतस्करी होत असताना तालुक्यातील वाळू तस्करांना नेमके आशीर्वाद कोणाचे? तस्करांच्या हप्तेखोरीत कोणा-कोणाचे खिसे गरम होताहेत! असा प्रश्न निर्माण झाला आहे. कासारवाडी, मंगळापुर, चिखली या परिसरात सुरू असलेली वाळू तस्करी देखील बरेच काही सांगून जाते.
