महाराष्ट्र संवाद न्यूज
औरंगाबाद – प्रसिद्ध कीर्तनकार निवृत्ती महाराज देशमुख (इंदोरीकर) यांच्या विरोधात गुन्हा दाखल करण्याचे आदेश औरंगाबाद खंडपीठाने दिले आहे. लिंगभेदावर भाष्य करणे महाराजांच्या अंगलट आले असून आता न्यायालयाच्या निर्णयामुळे इंदोरीकर महाराजांच्या अडचणीत वाढ झाली आहे.
इंदोरीकर महाराजांनी कीर्तनाच्या एका कार्यक्रमादरम्यान लिंगभेद भाष्य करत सम आणि विषम तारखेला शरीर संबंध ठेवल्यास मुलगा आणि मुलगी होत असल्याचे म्हटले होते. त्यांच्या या विधानावरून राज्यभरात गदारोळ उडाला होता. तर अंधश्रद्धा निर्मूलन समितीने या प्रकरणी न्यायालयात देखील धाव घेतली होती.
अंधश्रद्धा निर्मूलन समितीने केलेल्या तक्रारीची दखल घेत कनिष्ठ न्यायालयाने इंदोरीकर महाराज यांच्या विरोधात गुन्हा दाखल करण्याचे आदेश दिले होते. त्यानंतर इंदुरीकर यांच्यावतीने जिल्हा व सत्र न्यायालयात या विरोधात दाद मागण्यात आली. जिल्हा व सत्र न्यायालयाने इंदोरीकर यांना दिलासा देत गुन्हा रद्द केला होता. या विरोधात अंधश्रद्धा निर्मूलन समितीने औरंगाबाद खंडपीठात धाव घेतली होती.
औरंगाबाद खंडपीठात झालेल्या सुनावणीनंतर इंदोरीकर यांच्या विरोधात गुन्हा दाखल करण्याचे आदेश खंडपीठाने दिले आहेत. यासंबंधीचे वृत्त टीव्ही नाईन या वृत्तवाहिनीने दिले आहे.
इंदोरीकर महाराज यांचा या संबंधातील कीर्तनाचा एक व्हिडिओ देखील समाज माध्यमांवर व्हायरल झाला होता. यात महाराज लिंगभेदावर भाष्य करताना दिसून येत होते. “स्त्री संग सम तिथीला झाला तर मुलगा होतो, विषम तिथीला झाला तर मुलगी होते आणि स्त्री संग अशीव वेळी झाला तर होणारी संतती ही रांगडी बेवडी आणि खानदान मातीत घालणारी होते”. असं त्यांनी यात म्हटलं होतं.
आता औरंगाबाद खंडपीठाने इंदोरीकर यांच्यावर गुन्हा दाखल करण्याचे आदेश दिल्याने महाराजांच्या विरोधात गुन्हा दाखल होणार असून त्यांच्या अडचणीत देखील वाढ होणार आहे.
