महाराष्ट्र संवाद न्यूज
पुणे – एमपीएससी परीक्षेमध्ये राज्यात सहाव्या आलेल्या अहमदनगर जिल्ह्यातील कोपरगावच्या 26 वर्षीय दर्शना पवार हिचा संशयास्पद मृत्यू झाला आहे. पवार हिचा मृतदेह राजगड किल्ल्याच्या पायथ्याला कुजलेल्या अवस्थेत आढळून आल्याने याप्रकरणी वेल्हे पोलीस ठाण्यात अकस्मात मृत्यूची नोंद करण्यात आली आहे.
या प्रकाराने पुण्यात खळबळ उडाली आहे. दर्शना दत्ता पवार ही मुळची अहमदनगर जिल्ह्यातील कोपरगावची आहे. गेल्या काही वर्षांपासून ती स्पर्धा परिक्षेचा अभ्यास करत होती. पुण्यात देखील तिने क्लास लावला होता. त्यानंतर ती गावी जाऊन सेल्फ स्टडी करत होती. तसेच तिने स्पर्धा परिक्षेतून फॉरेस्ट ऑफिसर म्हणून राज्यातून तिसऱ्या क्रमांकाने यश मिळवले होते.
त्यामुळे पुण्यातील एका ॲकेडमीच्यावतीने तिचा सत्कार समारंभ होता. त्यानिमित्ताने ती 9 जूनला पुण्यात आली होती आणि नर्हे येथील एका मैत्रिणीकडे राहत होती. 12 जूनला तिने आपल्या मैत्रिणीला सिंहगड किल्ल्यावर ट्रेकींगसाठी जात असल्याचे सांगितले होते. कुटुंबाला देखील याबाबत तिने कल्पना दिली होती.
मात्र, तिथे गेल्यानंतर तिचा फोन बंद झाला आणि फोन बंद झाल्यामुळे तिच्या कुटुंबाने तीन दिवस तिचा शोध घेतला. पण ती सापडली नाही. यानंतर दर्शनाच्या कुटुंबाने सिंहगड रोड पोलिसांत मिसिंग तक्रार दाखल केली.
दरम्यान, या घटनेची माहिती मिळाल्यानंतर पोलिसांनी तात्काळ शोधकार्य सुरू केले. त्यानंतर रविवारी राजगड किल्ल्याच्या पायथ्याला झाडांमध्ये दर्शनाचा कुजलेल्या अवस्थेत मृतदेह आढळून आला. तिचा मोबाईल आणि इतर वस्तू त्याठिकाणी आढळून आल्या. पोलिसांनी तिच्या नातेवाईकांशी संपर्क साधला आणि कुटुंबाने धाव घेत तिची ओळख पटवली.
या प्रकरणी दर्शनाचा मित्र राहुल हा देखील तिच्यासोबत असल्याचं सांगितलं जात असून तिचा मित्र सध्या बेपत्ता आहे. 12 जून नंतर या दोघांचेही मोबाईल बंद असल्याचे आढळून आले. दर्शनाचा मृत्यू आत्महत्या की घातपात या दृष्टीने पुणे ग्रामीण, सिंहगड रस्ता व वारजे पोलिसांकडून याप्रकरणी तपास सुरू आहे.
