महाराष्ट्र संवाद न्यूज
संगमनेर – अहमदनगर जिल्ह्यातील रहिवासी असलेल्या चौघांचे सेवा जेष्ठतेनुसार भारतीय प्रशासकीय सेवेमध्ये निवड करण्यात आली आहे. यामध्ये संगमनेरच्या विकास पानसरे यांच्यासह गोरक्ष गाडीलकर गुलाबराव खरात व सतीश खडके यांचा समावेश आहे.
या चौघा अधिकाऱ्यांना लवकरच प्रशासकीय सेवेतील सर्वोच्च पद असलेले जिल्हाधिकारी पद भुषविण्याचा मान मिळणार आहे. विशेष म्हणजे निवड झालेले चौघेही आयएएस अधिकारी कृषी पदवीधर असतील. जिल्ह्यातील चौघांना एकाच वेळी हा सन्मान मिळाल्याने अहमदनगर जिल्ह्याची मान प्रशासकीय सेवेत उंचावली आहे.
सध्या अहमदनगर जिल्हा जात पडताळणी समितीचे अध्यक्ष असलेले विकास पानसरे संगमनेर तालुक्यातील घुलेवाडी येथील रहिवासी असून त्यांनी बारा वर्षांपूर्वी अहमदनगर येथे निवासी उपजिल्हाधिकारी म्हणून काम केले आहे.
सध्या नागपूर व धुळे येथील जात पडताळणी समितीचे अध्यक्ष म्हणून कार्यरत असलेले गोरक्ष गाडीलकर हे पारनेर तालुक्यातील असून 1996 मध्ये उपजिल्हाधिकारी पदी रुजू झाले होते. त्यांनी देखील अहमदनगरमध्ये काही काळ जिल्हा पुनर्वसन अधिकारी, रोजगार हमी योजना उपजिल्हाधिकारी, जळगाव येथे अपर जिल्हाधिकारी म्हणून काम पाहिले आहे. याशिवाय बुलढाणा येथे निवासी उपजिल्हाधिकारी अमरावती येथे भूसंपादन अधिकारी तर मोर्शी येथे प्रांताधिकारी म्हणून काम बघितले आहे.
नेवासे तालुक्यातील भेंडा येथील रहिवासी असलेले गुलाबराव खरात हे गत 25 वर्षांपासून महसूल विभागात कार्यरत आहे. त्यांनी देखील अमरावती, बुलढाणा, जळगाव आणि धुळे येथे जिल्हा जात पडताळणी समितीचे अध्यक्ष म्हणून काम बघितले. अहमदनगर येथे जिल्हा पुरवठा अधिकारी, जिल्हा पुनर्वसन अधिकारी या पदावर काम केले आहे. पदोन्नतीनंतर त्यांनी नंदुरबार, जळगाव येथे अतिरिक्त जिल्हाधिकारी म्हणून काम बघितले आहे. काही काळ ते पुणे येथे शेती महामंडळाचे मुख्य कार्यकारी अधिकारी म्हणून कार्यरत होते.
याचबरोबर सतीश खडके हेदेखील अहमदनगर जिल्ह्यातील चिचोंडी पाटील येथील रहिवासी आहे. 1995 मध्ये महाराष्ट्र लोकसेवा आयोगाच्या राज्यसेवा परीक्षेत राज्यात प्रथम आलेले खडके सध्या सिडकोचे अपर जिल्हाधिकारी म्हणून सध्या काम पाहत आहे. त्यांनी सुरुवातीला विक्रीकर अधिकारी नंतर जळगावचे प्रांताधिकारी म्हणून काम बघितले असून नाशिक महापालिकेत देखील त्यांनी काम केले आहे. याशिवाय पिंपरी-चिंचवड प्राधिकरणाचे मुख्य कार्यकारी अधिकारी म्हणूनही त्यांनी कामकाज सांभाळले.
