महाराष्ट्र संवाद न्यूज
संगमनेर शहर पोलीस ठाण्यात दाखल असलेल्या गुन्ह्यांमध्ये तपासात पोलिसांना सहकार्य करण्याच्या व हर्बल औषधांसह कोणत्याही प्रकारचे औषध रुग्णांना न देण्याच्या अटीवर संगमनेरच्या जिल्हा व अतिरिक्त सत्र न्यायालयाने ‘त्या’ डॉक्टरला तब्बल महिनाभरानंतर अटकपूर्व जामीन मंजूर केला आहे.
बोगस डॉक्टर शोध समितीच्या सचिव डॉक्टर प्रतिभा कचकुरे यांनी दिलेल्या फिर्यादीवरून संगमनेर शहर पोलीस ठाण्यात जावेद आयुब शेख यांच्या विरोधात महाराष्ट्र वैद्यक व्यावसायिक अधिनियम 1961 च्या कलम 33 व 37 नुसार गुन्हा दाखल करण्यात आला होता. त्यानंतर डॉ. शेख यांनी संगमनेरच्या जिल्हा व अतिरिक्त सत्र न्यायालयात ॲड. शरीफ पठाण व ॲड. मोहसीन शेख यांच्या माध्यमातून अटकपूर्व जामीन अर्ज दाखल केला होता. न्यायाधीश प्रशांत कुलकर्णी यांच्यासमोर या जामीन अर्जावर सुनावणी झाली. न्यायाधीश कुलकर्णी यांनी अटी शर्तींवर आरोपी डॉ. शेख यांना जामीन मंजूर केला आहे.
काय होती तक्रार…
कॉटेज हॉस्पिटलच्या प्राथमिक आरोग्य केंद्रात कार्यरत असलेल्या वैद्यकीय अधिकारी तथा बोगस डॉक्टर शोध समितीच्या सचिव प्रतिभा कचकुरे यांना संगमनेर नगर परिषदेचे मुख्याधिकारी तथा बोगस डॉक्टर शोध समितीचे अध्यक्ष राहुल वाघ यांनी डॉ. जावेद आयुब शेख यांच्या नवरंग कॉम्प्लेक्स, बागवानपुरा येथील क्लिनिकची तपासणी करण्याचे आदेश दिले होते. तपासणीमध्ये कचकुरे यांना तपासणी दरम्यान डॉक्टर शेख यांच्याकडे वैद्यकीय व्यवसायाची कोणतेही डिग्री आढळून आली नाही तसेच ते रुग्णांवर उपचारासाठी नैसर्गिक जडीबुटीचा वापर करत असल्याबाबत त्यांनी माहिती दिली होती.
शेख यांनी पथकातील अधिकाऱ्यांना वैद्यकीय व्यवसायातील नोंदणी प्रमाणपत्र दाखविले नाही सादर केले नाही तसेच त्यांच्याकडे कौन्सिल ऑफ नॅचरोपॅथीचे रजिस्ट्रेशन आढळून आले नाही.
डॉ. शेख यांच्याकडे आढळलेली कागदपत्रे, कोणतेही नाव नसलेले गोळ्यांची डबी, चुरणाचे डबे वैद्यकीय व्यवसाय करण्यासाठी पुरेशी नसल्याने त्यांना बोगस डॉक्टर ठरवून त्यांच्यावर कारवाई करण्यात आली होती.
