महाराष्ट्र संवाद न्यूज
संगमनेर – रिक्षातून प्रवास करणाऱ्या महिलेकडील पंच्याहत्तर हजार रुपयांचे रोकड दुसऱ्या सहप्रवासी महिलेने लांबविल्याचा प्रकार समोर आला आहे. या संदर्भात शहर पोलीस ठाण्यात अज्ञात महिला चोरट्याविरोधात गुन्हा दाखल करण्यात आला आहे.
शुक्रवारी अमृतवाहिनी इंजिनिअरिंग कॉलेज येथून ब्युटी पार्लर व्यावसायिक महिला उज्वला सातपुते या रिक्षाने जवळ असलेली पंच्याहत्तर हजार रुपयाची रोख रक्कम घेऊन मैत्रिणीच्या बँक खात्यात एचडीएफसी बँकेत भरण्यासाठी संगमनेरकडे येत असताना ही घटना घडली.
सकाळी 11 वाजता त्या सहकार महर्षी भाऊसाहेब थोरात सहकारी साखर कारखान्याच्या गेटवरून प्रवासी रिक्षात बसून संगमनेरकडे येत होत्या. यावेळी रिक्षात त्या एकट्याच होत्या. दरम्यान रिक्षा घुलेवाडी जवळील म्हसोबा मंदिराजवळ आल्यानंतर दोन महिलांनी रिक्षाला हात केल्याने रिक्षा थांबली. त्यानंतर या दोन महिला रिक्षात बसल्या.
पुढे काही अंतरावर नावंदर टायर दुकानाजवळ आणखी दोन महिलांनी रिक्षा थांबविली. दोघींपैकी एक महिला सातपुते यांच्या शेजारी तर दुसरी महिला रिक्षाचालका शेजारी बसली होती. सातपुते यांच्यासह रिक्षातील पाच महिलांपैकी चार महिला मागच्या सीटवर दाटीवाटीने तर एक महिला पुढच्या सीटवर बसलेली होती. सह्याद्री कॉलेज जवळ रिक्षातील नंतर बसलेल्या दोन महिलांनी रिक्षा थांबविण्यास सांगितले व त्या रिक्षातून खाली उतरल्या.
त्यानंतर पुढे जय जवान चौकाजवळ रिक्षातील उरलेल्या दोन महिलांनी रिक्षा थांबून त्या रिक्षातून खाली उतरल्या. तर सातपुते रिक्षातून हॉटेल काश्मीर जवळ उतरण्यासाठी थांबल्या. यावेळी त्यांनी रिक्षा चालकाला पैसे देण्यासाठी स्वतः जवळील पर्स बघितली असता त्यांना पर्सची चैन उघडी दिसली. त्यावेळी त्यांना पर्समधून पंच्याहत्तर हजार रुपये अज्ञात महिलेने लांबविल्याचे लक्षात आले.
त्यांनी या संदर्भात संगमनेर शहर पोलीस ठाण्यात दिलेल्या तक्रारीवरून अज्ञात महिलेविरोधात चोरीचा गुन्हा दाखल करण्यात आला आहे. दरम्यान रिक्षातून सहप्रवासी महिलेने रोख रक्कम लांबविल्याने शहरात चोरट्यांनी दहशतीचे वातावरण निर्माण केले आहे. ही दहशत मोडून काढण्याचे आव्हान संगमनेर पोलिसांसमोर आहे.
