महाराष्ट्र संवाद न्यूज
संगमनेर – संगमनेरच्या आदर्श सहकारावर प्रश्नचिन्ह निर्माण करणाऱ्या दूधगंगा नागरी पतसंस्थेच्या 81 कोटी रुपयांच्या गैरव्यवहार प्रकरणी संगमनेर पोलिसांनी अटक केलेल्या व्यवस्थापक भाऊसाहेब विठ्ठल गुंजाळ याला संगमनेरच्या न्यायालयाने 24 ऑगस्टपर्यंत पोलीस कोठडी सुनावली आहे.
पोलीस निरीक्षक भगवान मथुरे यांनी: व्यवस्थापक भाऊसाहेब विठ्ठल गुंजाळ याला सोमवारी पोलिसांनी अटक केली होती. मंगळवारी त्याला संगमनेरच्या प्रथमवर्ग न्यायालयात पोलीस कोठडी मिळण्यासाठी तपास अधिकारी तथा पोलीस निरीक्षक भगवान मथुरे यांनी हजर केले. न्यायाधीश एस. एम. वाघचौरे यांनी आरोपीला 24 ऑगस्टपर्यंत पोलीस कोठडी सुनावली. कोठडी दरम्यान आरोपी कडून आणखी काय माहिती समोर येते. हे 24 ऑगस्टला समजणार आहे.
सहकाराची विश्वासार्हता धोक्यात: संगमनेरचे अर्थकारण सहकारावर आधारित असून येथील सहकारी पतसंस्थांनी सामान्य माणसाला पत मिळवून देण्याचे काम केले. मात्र आता याच पतसंस्था त्यातील कारभाऱ्यांसाठी गैरव्यवहाराच्या कुरण बनल्या असल्याचे समोर येत आहे. सहकारातील नावलौकिक असलेल्या आणि माजी मंत्री, आमदार बाळासाहेब थोरात यांच्या नेतृत्वावर विश्वास ठेवून सुरू असलेली शेतकऱ्यांची कामधेनू ठरलेल्या दूधगंगा नागरी पतसंस्थेचा पतसंस्था विश्वातील सर्वात मोठा अपहराचा प्रकार समोर आला आहे.
कोण आहे मुख्य आरोपी: तत्कालीन काँग्रेस नेता, जिल्हा परिषद सदस्य, सहकार महर्षी भाऊसाहेब थोरात सहकारी साखर कारखान्याचा उपाध्यक्ष अशी विविध पदे उपभोगलेल्या भाऊसाहेब कुटे याने घरातील सदस्य, नातेवाईकांसह अन्य काही जणांच्या मदतीने तब्बल 81 कोटी रुपयांचा अपहार केल्याचे समोर आले आहे. कुटे याच्यासह पत्नी, मुल, सुन, बँकेचा व्यवस्थापक, लेखापरीक्षकांसह तब्बल 21 जणांविरोधात संगमनेर शहर पोलीस ठाण्यात गुन्हा दाखल करण्यात आला.
पोलिसांच्या भूमिकेकडे लक्ष: मुख्य आरोपी कुटे परिवारातील अन्य आरोपी सदस्यांसह फरार आहे. कुटे याला पकडण्यात संगमनेर पोलीस यशस्वी होतात की कुटे स्वतः सह परिवाराला जामीन मिळविण्यात यशस्वी होतो हे लवकरच समजणार आहे.
