महाराष्ट्र संवाद न्यूज
संगमनेर – अहमदनगरच्या स्थानिक गुन्हे शाखेच्या पथकाने संगमनेर शहरात सुरू असलेल्या बेकायदेशीर कत्तलखान्यावर कारवाई करत सुमारे 600 किलो जनावराच्या गोमांसासह सुमारे सव्वाचार लाखाचा मुद्देमाल हस्तगत केला. याप्रकरणी पोलिसांनी एकाला ताब्यात घेतले असून एक जण घटनास्थळावरून पसार झाला आहे.
या कर्मचाऱ्यांनी केली कारवाई: नगरच्या स्थानिक गुन्हे शाखेचे पोलीस निरीक्षक दिनेश आहेर यांच्या आदेशावरून गुन्हे शाखेचे पोलीस हेडकॉन्स्टेबल दत्तात्रय गव्हाणे, पोलीस नाईक संतोष लोंढे, गणेश भिंगारदे, पोलीस कॉन्स्टेबल अशोक गुंजाळ, अमृत आढाव, सचिन अडबल यांचे पथक अवैध धंद्यावर कारवाई करण्यासाठी संगमनेरमध्ये गस्त घालत होते. या पथकाला जुने जोर्वे रोड परिसरातील जमजम कॉलनीत अब्दुल हमीद कुरेशी हा गोवंश जनावरांची कत्तल करून त्याचे मांस एका छोटा हत्ती टेम्पोत भरत असल्याची माहिती मिळाली होती.
पाठलाग करून एकाला पकडले: या पथकाने संगमनेर शहर पोलीस ठाण्याचे पोलीस उपनिरीक्षक बाळासाहेब यादव, पोलीस नाईक लुमा भांगरे, पोलीस कॉन्स्टेबल संतोष बाचकर यांना सोबत घेत मिळालेल्या माहितीच्या ठिकाणी सोमवारी रात्री साडेआठ वाजता छापा टाकला असता घटनास्थळी एका पत्राच्या शेडजवळ दोन व्यक्ती एका छोटा हत्ती टेम्पोमध्ये गोमांस भरत असल्याचे दिसून आले. पोलिसांनी छापा टाकल्याचे दिसतात या दोन्ही व्यक्ती घटनास्थळावरून पळून जाऊ लागले असता पोलिसांनी पाठलाग करत त्यापैकी एकाला पकडले. तर दुसरा पळून जाण्यात यशस्वी झाला.
मिळाला हा मुद्देमाल: घटनास्थळावरून पोलिसांनी एक टाटा कंपनीचा (MH04 GC 4846) चार चाकी टेम्पो, त्यात सुमारे 80 हजार रुपये किमतीचे 400 किलो गोमांस, पत्र्याच्या वाड्यातून 40 हजार रुपये किमतीचे 200 किलो गोमांस, लोखंडी सत्तुर, सुरा असा चार लाख वीस हजार रुपये किमतीचा मुद्देमाल ताब्यात घेतला. पकडलेल्या आरोपीकडे चौकशी केली असता त्याचे नाव अब्दुल हमीद अहमद कुरेशी (वय 29 वर्ष, रा. गल्ली नंबर 6, जमजम कॉलनी, संगमनेर) तर पळून गेलेल्या व्यक्तीचे नाव मोहम्मद शमशाद आलम शेख (रा. जमजम कॉलनी, संगमनेर) असे असल्याचे निष्पन्न झाले.
याच्या विरोधात गुन्हा: संगमनेर शहर पोलीस ठाण्यात पोलीस नाईक सचिन दत्तात्रय अडबल यांनी दिलेल्या फिर्यादीवरून आरोपी अब्दुल हमीद अहमद कुरेशी याच्या विरोधात भादवी कलम 269, 34, महाराष्ट्र पशु संरक्षण अधिनियम 5 (सी) व 9 अन्वये गुन्हा दाखल करण्यात आला आहे. शहर पोलीस ठाण्याचे पोलीस पुढील तपास करत आहे.
