महाराष्ट्र संवाद न्यूज
संगमनेर – शिक्षण घेणाऱ्या अल्पवयीन मुलीशी मैत्री करत तिच्यावर वारंवार अत्याचार करणाऱ्या दोघा आरोपींना अटक केल्यानंतर पोलिसांनी याप्रकरणी मोठे पाऊल उचलले होते. अत्याचारासाठी आरोपींना मदत केल्याच्या कारणावरून सहा जणांना पोलिसांनी सहआरोपी केले आहे. यातील कॅफे मालकाला मंगळवारी पोलिसांनी अटक केली. आत्तापर्यंत पोलिसांनी या प्रकरणात अत्याचार करणाऱ्या दोन आरोपींसह लॉज चालक, कॅफे मालक अशा पाच जणांना अटक केली आहे. मंगळवारी अटक केलेल्या राहुल गौतम भालेराव या कॅफे मालकाला बुधवारी संगमनेरच्या जिल्हा व अतिरिक्त सत्र न्यायालयाचे न्यायाधीश प्रशांत कुलकर्णी यांनी एक दिवसांची पोलीस कोठडी दिली आहे.
विविध ठिकाणी यांनी केला अत्याचार: संगमनेर शहरालगत राहावयास असलेल्या एका अंदाजे १७ वर्षे वयाच्या मुलीवर संगमनेर, शिर्डी, पेमगिरी, विठ्ठल कडा, कऱ्हे घाट येथे आशिष नानासाहेब राऊत (वय २० वर्ष) व किरण सोपान राऊत (वय ३० वर्ष, दोघे रा. मालुंजकर मळा, घुलेवाडी, ता. संगमनेर, जि. अहमदनगर) या दोघांनी वारंवार अत्याचार केल्याचा प्रकार समोर आला होता.
लॉज, कॅफे उपलब्ध करून देणाऱ्यांना केले सहआरोपी: पीडित मुलीच्या तक्रारीवरून संगमनेर शहर पोलिसांनी आशिष नानासाहेब राऊत व किरण सोपान राऊत या दोघा प्रमुख आरोपींसह त्यांना मदत करणाऱ्या अत्याचारासाठी कॅफे, लॉज उपलब्ध करून देणाऱ्या अन्य पाच जणांना सहआरोपी करत या सर्वांवर भारतीय दंड विधान संहिता कलम ३७६(२)(एन), ३६३ आणि बालकांचे लैंगिक अत्याचारापासून संरक्षण प्रतिबंधक कायदा कलम ४, ६, ८, १२ व १७ (पोक्सो) नुसार गुन्हा दाखल केला होता.
आत्तापर्यंत पाच अटकेत: याप्रकरणी शहर पोलिसांनी आतापर्यंत अत्याचार करणारे आरोपी आशिष नानासाहेब राऊत, किरण सोपान राऊत यांच्यासह नांदूर शिंगोटे येथील लॉज चालक ज्ञानेश्वर किसन क्षीरसागर, शिर्डी येथील लॉज चालक आकाश भास्कर बोंडारे यांना अटक केली असून हे सर्व आरोपी कोठडीत आहेत. याशिवाय मंगळवारी संगमनेरातील कॅफे क्रश बक्सचा मालक राहुल गौतम भालेराव, (राहणार भालेकर वस्ती मालदाड, संगमनेर) याला देखील अटक केली.
तिघे अद्यापही पसार: या गुन्ह्यातील तीन आरोपी फरार असून त्यातील दोघे कॅफे मालक आहेत. एका आरोपीचे नाव निष्पन्न झाले असले तरी त्याची अद्याप पूर्ण ओळख पटलेली नाही. उर्वरित आरोपींना तपास अधिकारी पोलीस उपनिरीक्षक निवांत जाधव कधी अटक करतात याकडे लक्ष लागले आहे.
