संगमनेर दि. – २
एसएमबीटी ही संस्था आता देशातील आरोग्य सेवेचा ब्रँड नेम ठरली आहे. दररोज हजारो शस्त्रक्रिया एसएमबीटीमध्ये होत आहे. संगमनेर तालुक्यातील रुग्णांना सोयीस्कर व्हावे यासाठी अमृतवाहिनी रोलर हॉस्पिटलमध्ये एसएमबीटीची बाह्य रुग्णसेवा उपलब्ध करून देण्यात आली असल्याचे प्रतिपादन नासिक पदवीधर मतदारसंघाचे माजी आमदार डॉ. सुधीर तांबे यांनी केले.
संगमनेरमधील गोरगरीब आणि सामान्य नागरिकांना आरोग्याच्या अत्याधुनिक व दर्जेदार सुविधा त्वरित व माफक दरात उपलब्ध व्हाव्या, या हेतूने काँग्रेस नेते आमदार बाळासाहेब थोरात यांच्या मार्गदर्शनाखाली अमृतवाहिनी हॉस्पिटलमध्ये एसएमबीटी क्लिनिकचा पूर्णवेळ सुपर स्पेशालिटी बाह्य रुग्ण विभाग शनिवारी सुरू करण्यात आला. यावेळी माजी आमदार डॉ. सुधीर तांबे बोलत होते.
माजी आमदार तांबे यांच्यासह कॅन्सर तज्ञ डॉ. जयश्री थोरात, माजी जिल्हा परिषद सदस्य रामहरी कातोरे, मुख्य कार्यकारी अधिकारी श्रीराम कुऱ्हे, प्राचार्य डॉ. अशोक पाटील, डॉ. बाळकृष्ण देशपांडे, डॉ. सचिन गोडसे, डॉ. नितीन बस्ते, डॉ. राज मस्के, सुरज कडलग, डॉ. सुरज तुपसागरे, डॉ. सचिन बोरसे, महेश वाव्हळ, सिताराम दिघे, धनंजय भुसाळ आदींसह एसएमबीटीमधील विविध डॉक्टर्स, कर्मचाऱ्यांसह कार्यकर्ते मोठ्या संख्येने उपस्थित होते.
डॉ. तांबे म्हणाले, गोरगरीब आदिवासी व सर्वसामान्य माणसांच्या आरोग्य सेवेकरिता थोर स्वातंत्र्य सेनानी सहकारमहर्षी भाऊसाहेब थोरात यांनी एसएमबीटी सेवाभावी ट्रस्टच्या माध्यमातून अमृतवाहिनी रूलर हॉस्पिटल सुरू केले. अमृतवाहिनी हॉस्पिटलमधील एसएमबीटीच्या या बाह्य रुग्ण विभागांमध्ये एसएमबीटीमधील तज्ञ डॉक्टर दररोज भेट देणार असून ते रुग्णांची तपासणी करतील.
कॅन्सरतज्ञ डॉ. जयश्री थोरात म्हणाल्या, प्रत्येक माणूस आरोग्याकडे दुर्लक्ष करत असून त्यामुळे आरोग्याच्या समस्या उद्भवतात. ग्रामीण भागातील नागरिकांना चांगल्या आरोग्य सुविधा मिळाव्या याकरिता एसएमबीटीच्या माध्यमातून अत्यंत चांगले काम होत असून संगमनेर तालुक्यात नव्याने सुरू झालेल्या या बाह्यरुग्ण विभागामुळे गोरगरीब, शेतकरी, महिला यांची मोठी सोय होणार आहे. येथे काही ऑपरेशनसह विविध शस्त्रक्रिया तसेच तपासण्या केल्या जाणार असून मोठ्या शस्त्रक्रिया तातडीने एसएमबीटी हॉस्पिटलमध्ये केल्या जाणार आहेत.
या बाह्यरुग्ण विभागामध्ये दररोज हृदयविकार शस्त्रक्रिया, कर्करोग, मूत्रविकार, मेंदू व मणके विकार, सांधेरोपण क्रिया, प्लास्टिक सर्जरी, जन्मजात आजार ,अँजिओग्राफी, अँजिओप्लास्टी, डीआरटीडी, ईपी स्टडी आदींसह सोनोग्राफी, रक्त, लघवी, तपासणी अशा विविध तपासण्याही केल्या जाणार आहेत.
हृदयविकार तज्ञ डॉ. गौरव वर्मा दर मंगळवार व शुक्रवारी…
महिन्याचा पहिल्या व तिसऱ्या बुधवारी कर्करोग तपासणी केली जाणार आहे. तर दर मंगळवारी व शुक्रवारी प्रसिद्ध हृदयरोग तज्ञ डॉ. गौरव वर्मा हे हृदयरोग विकाराची तपासणी करणार आहेत. शुक्रवारी मेंदू व मनके विकाराशी संबंधित आजाराच्या तपासण्या होणार असून महिन्याच्या पहिल्या व तिसऱ्या शनिवारी मूत्ररोग विकार तपासणी होणार आहे. या क्षेत्रातील तज्ञ व नामवंत डॉक्टर तपासणीसाठी उपस्थित राहून उपचार करणार असल्याची माहिती देण्यात आली.
