गुरुवार, दि. १८ एप्रिल
राज्य महिला आयोगाच्या सदस्य असलेल्या उत्कर्षा रूपवते यांनी काँग्रेसचा राजीनामा देत वंचित बहुजन आघाडी प्रवेश करतात गुरुवारी वंचित कडून शिर्डी लोकसभा मतदारसंघासाठी त्यांची उमेदवारी जाहीर करण्यात आली. यामुळे आता शिर्डीत महाविकास आघाडी विरुद्ध महायुती विरुद्ध वंचित बहुजन आघाडी अशी तिरंगी लढत रंगणार आहे.
शिर्डीत वंचितच्या उमेदवारामुळे राजकीय गणिते बदलण्यास सुरुवात झाली आहे. रुपवते यांच्या उमेदवारीचा फटका महाविकास आघाडीचे उमेदवार भाऊसाहेब वाकचौरे यांना सर्वाधिक बसण्याची चिन्हे वर्तवली जात आहे. तर दुसरीकडे गेल्या दहा वर्षापासून मतदार संघात फारसे न फिरकणाऱ्या खासदार सदाशिव लोखंडे यांच्या विषयी मतदारसंघात नाराजीचे वातावरण आहे. अशा स्थितीत रूपवते यांची उमेदवारी या मतदारसंघात काय परिणाम करते हे येत्या काही दिवसात स्पष्ट होईल.
वंचित बहुजन आघाडीच्या राज्य अध्यक्ष रेखा ठाकूर यांनी गुरुवारी शिर्डी आणि सातारा या जागेवरील आपल्या उमेदवारांच्या नावाची घोषणा केली. शिर्डीतून कालच पक्षात प्रवेश केलेल्या उत्कर्षा रूपवते यांना तर सातारा लोकसभा मतदारसंघातून प्रशांत कदम यांना उमेदवारी जाहीर करण्यात आली आहे.
