रविवार, दि.२१ एप्रिल
नांदूर शिंगोटे – लोणी रस्त्यावर संगमनेर तालुक्यातील निमोण गावात झालेल्या कंटेनर व दुचाकीच्या भीषण अपघातात दोघांचा जागीच मृत्यू झाला. तर अन्य एक जण गंभीर जखमी असून त्याच्यावर उपचार सुरू आहे. अपघातातील मृत नाशिक जिल्ह्यातील नांदूर शिंगोटे गावचे असून जखमी अकोले तालुक्यातील गर्दनी गावचा आहे.
शनिवारी रात्रीच्या सुमारास हा अपघात झाला. कुंडलिक पंढरीनाथ मेंगाळ (वय ३० वर्ष) व युवराज धोंडीबा मेंगाळ (वय २९ वर्ष, दोघेही रा. नांदूर शिंगोटे, नाशिक) अशी दोघा मृत तरुणांची नावे असून संदीप संतोष आगिवले (रा. गर्दनी, ता. अकोले, जि. अहमदनगर) हा गंभीर जखमी झाला असून त्याला सिन्नरच्या दोडी येथील प्राथमिक आरोग्य केंद्रात उपचारासाठी दाखल करण्यात आले मात्र त्याची प्रकृती चिंताजनक असल्याचे पोलीस अधिकाऱ्यांनी सांगितले.
अपघातातील तिघेही युवक आपल्या पल्सर मोटरसायकल वरून जात असताना त्यांची आणि बालाजी कंपनीच्या नमकीनची वाहतूक करणारा कंटेनरची (GJ 15 AV 6656) समोरासमोर धडक झाली. या भीषण अपघातात दुचाकीवरील दोघांचा मृत्यू झाला तर तिसरा गंभीर जखमी झाला.
घटनेची माहिती मिळतच संगमनेरचे डीवायएसपी सोमनाथ वाघचौरे, संगमनेर तालुका पोलीस ठाण्याचे पोलीस निरीक्षक देविदास ढुमणे यांच्यासह पोलीस पथक तातडीने घटनास्थळी दाखल झाले होते. पोलिसांनी अपघातग्रस्त वाहने ताब्यात घेतले असून ती संगमनेर तालुका पोलीस ठाण्यात आणण्यात आली आहे.
