शुक्रवार, दि. ३१ मे
नाशिकच्या विभागीय महसूल आयुक्तपदी राज्य शासनाने डॉ. प्रवीण गेडाम यांची नियुक्ती केली आहे. अपर मुख्य सचिव राजगोपाल देवरा यांनी गेडाम यांच्या नियुक्तीचे आदेश काढले असून तातडीने पदभार स्वीकारण्यास सांगितले आहे.
नाशिकचे महसूल आयुक्त राधाकृष्ण गमे शुक्रवारी (३१ मे) सेवानिवृत्त झाले. त्यांच्या रिक्त जागेवर गेडाम यांची नियुक्ती करण्यात आली आहे. कडक शिस्तीचे आणि खमके अधिकारी म्हणून डॉ. गेडाम सर्वपरिचित आहेत.
अहमदनगर, नासिक, नंदुरबार, धुळे आणि जळगाव या जिल्ह्यांचा कार्यभार डॉ. गेडाम यांच्याकडे असेल. गेडाम यांच्याकडे सध्या कृषी विभागाच्या आयुक्तपदाचा पदभार होता. तर सुरुवातीच्या काळात काही काळ त्यांनी संगमनेर नगर परिषदेचे मुख्याधिकारी म्हणून देखील काम पाहिले. त्यांचा कार्यकाल आजही संगमनेरकरांच्या स्मरणात आहे.
नासिक महापालिकेसह अन्य खात्यामध्ये त्यांनी यापूर्वी काम बघितले आहे. सध्या लोकसभा आणि नाशिक शिक्षक मतदार संघाची आचारसहिता सुरू असून ती संपताच या विभागातील ठप्प झालेली विकास कामे, विविध अनुदाने व वितरण आदीसह महत्त्वाच्या प्रश्नांवर गेडाम यांना लक्ष घालावे लागणार आहे.
