महाराष्ट्र संवाद न्यूज ऑनलाईन-
संगमनेर नगरपालिका हद्दीतील मोक्याच्या ठिकाणी असलेल्या शासकीय जागेवर मोठ्या प्रमाणावर अतिक्रमण झाल्याचा प्रकार समोर आला असून, आता या प्रकरणी महसूल विभाग आणि नगरपरिषद प्रशासन ॲक्शन मोडमध्ये आले आहे. बीएसएनएल (BSNL) कार्यालयाशेजारी आणि पोलीस कॉलनीसमोर असलेल्या भूमापन क्रमांक ८६/४१ मधील प्लॉटवर पसरलेले अतिक्रमण हटवण्यासाठी तक्रार अर्ज दाखल झाल्यानंतर संगमनेरचे प्रांताधिकारी अरुण उंडे यांच्यासह नगरपालिका प्रशासनाने कारवाईचा बडगा उगारण्यास सुरुवात केली आहे.
शासकीय भूखंडावर झालेल्या अतिक्रमण संदर्भात शहरातील काही सुज्ञ नागरिकांनी ५ ऑक्टोबर २०२६ रोजी प्रांताधिकाऱ्यांकडे यासंदर्भात तक्रार अर्ज दाखल केला होता. या अर्जात नमूद केल्यानुसार, सदर ८६/४१ हा प्लॉट जिल्हाधिकारी यांच्या नावे असून तो तहसीलदार, तलाठी आणि कर्मचाऱ्यांच्या निवासासाठी राखीव आहे. सोबतच या जागेवर प्ले ग्राउंड, प्रायमरी स्कूल, मॅटर्निटी होम, हायस्कूल आणि म्युनिसिपालटी मार्केट यासारखी नगरपरिषदेची महत्त्वपूर्ण आरक्षणे आहेत. असे असतानाही या जागेवर बेकायदेशीरपणे दुकाने थाटून आणि बांधकामे करून अतिक्रमण करण्यात आले आहे.
तक्रारदारांच्या या अर्जाची गंभीर दखल घेत उपविभागीय अधिकारी कार्यालयाने ८ ऑक्टोबर २०२६ रोजी तहसीलदार आणि संगमनेर नगरपरिषदेच्या मुख्याधिकाऱ्यांना या प्रकरणाची सविस्तर चौकशी करून नियमानुसार कारवाई करण्याचे आदेश दिले असल्याची माहिती समोर येत आहे.
संगमनेर नगरपरिषदेचे मुख्याधिकारी दयानंद गोरे यांनी १४ ऑक्टोबर २०२६ रोजी संगमनेर बुद्रुकच्या तलाठी व ग्राम महसूल अधिकाऱ्यांना पत्र पाठवून जागेची अचूक हद्द व प्रत्यक्ष ताब्याची माहिती सादर करण्याचे निर्देश दिले आहेत. या पत्रात ०.३५.०० हेक्टर आर क्षेत्र असलेल्या या जागेचा ७/१२ उतारा, फेरफार नोंदी, भूमि अभिलेख कार्यालयाकडून प्रत्यक्ष मोजणी नकाशा आणि अतिक्रमणाबाबत पूर्वी दिलेल्या नोटीसांची सविस्तर माहिती मागवण्यात आली आहे.
सरकारी जागेचा हक्क स्पष्ट करून नगरपरिषदेच्या मंजूर विकास योजनेतील आरक्षणाची पडताळणी केली जाणार आहे. जर या अतिक्रमणांवर वेळेत योग्य ती कारवाई झाली नाही किंवा जागा मोकळी केली नाही, तर तीव्र उपोषण करण्याचा इशाराही अर्जदारांनी निवेदनाद्वारे दिला आहे. प्रशासनाच्या या धडक पाऊलांमुळे आता भूखंडावर अतिक्रमण करणाऱ्यांचे धाबे दणाणले असून पुढील कारवाईकडे संपूर्ण संगमनेर शहराचे लक्ष लागले आहे.