मंगळवार, १८ जून २०२४
आपल्या १९ वर्षाच्या प्रशासकीय कार्यकाळात वीसपेक्षा अधिक बदल्यांना सामोरे जाणाऱ्या व प्रशासनातील धडाकेबाज अधिकारी म्हणून ख्याती असलेल्या आयएएस अधिकारी तुकाराम मुंढे यांची राज्य शासनाने पुन्हा एकदा बदली केली आहे.
मुख्य सचिव नितीन गद्रे यांनी मंगळवारी मुंढे यांच्या बदलीचे आदेश काढले आहे. या बदलीमुळे मुंढे पुन्हा एकदा चर्चेत आले आहे. मुंढे यांच्या रिक्त जागी राजेश कुमार यांची नियुक्ती करण्यात आली असल्याचे देखील या आदेशात म्हटले आहे.
मुंढे यांच्याकडे दुग्धविकास आणि पशुसंवर्धन या खात्याच्या सचिवपदाचा पदभार होता. या पदावरून त्यांची बदली आता कमी महत्त्वाच्या असलेल्या विकास आयुक्त (असंघटित कामगार) मुंबई या पदावर करण्यात आली आहे. प्रशासकीय सेवेत धडाकेबाज अधिकारी म्हणून ख्याती असलेल्या मुंढे यांना अनेकदा राज्यकर्त्यांच्या रोशाचा सामना करावा लागला आहे. त्यामुळे त्यांच्यावर सातत्याने बदलीची टांगती तलवार असते.
राजकीय नेत्यांसोबत सातत्याने खटके उडाल्याने वादग्रस्त अधिकारी म्हणूनही त्यांची राजकीय वर्तुळात ओळख आहे. मात्र, तुकाराम मुंढे आणि बदली हे नवं समीकरण राज्यात गेल्या काही वर्षात पाहायला मिळत आहे. पशुसंवर्धन आणि दुग्ध विकासाच्या सचिवपदी गतवर्षी बदली करण्यात आलेल्या तुकाराम मुंडेंची पुन्हा एकदा बदली झाल्याने आता ते नव्या विभागाचे विकास आयुक्त असतील.
तुकाराम मुंढे यांची आत्तापर्यंत कधी व कुठे झाली बदली…
ऑगस्ट २००५ – प्रशिक्षणार्थी, उपजिल्हाधिकारी सोलापूर
सप्टेंबर २००७ – उप जिल्हाधिकारी, देगलूर उपविभाग
जानेवारी २००८ – सीईओ, जिल्हा परिषद नागपूर
मार्च २००९ – आयुक्त, आदिवासी विभाग
जुलै २००९ – सीईओ, वाशिम
जून २०१० – सीईओ, कल्याण
जून २०११ – जिल्हाधिकारी, जालना
सप्टेंबर २०१२ – विक्रीकर सहआयुक्त मुंबई
नोव्हेंबर २०१४ – सोलापूर जिल्हाधिकारी
मे २०१६ – आयुक्त, नवी मुंबई महापालिका
मार्च २०१७ – मुख्य कार्यकारी अधिकारी, पीएमपीएल, पुणे
फेब्रुवारी २०१८ – आयुक्त, नाशिक महापालिका
नोव्हेंबर २०१८ – सहसचिव, नियोजन
डिसेंबर २०१८ -प्रकल्प अधिकारी, एड्स नियंत्रण, मुंबई
जानेवारी २०२० – आयुक्त, नागपूर महापालिका
ऑगस्ट २०२० – सदस्य सचिव, महाराष्ट्र जीवन प्राधिकरण, मुंबई
जानेवारी २०२१ – राष्ट्रीय मानवाधिकार आयोग भारत
सप्टेंबर २०२२ – आयुक्त आरोग्य सेवा व संचालक, राष्ट्रीय आरोग्य अभियान
जून २०२२ – मराठी भाषा विभाग
जुलै २०२३ – पशुसंवर्धन आणि दुग्ध विकास विभाग
१८ जून २०२४ – विकास आयुक्त (असंघटित कामगार)
