बुधवार, १९ जून
नाशिक विभाग शिक्षक मतदार संघात महायुतीचा उमेदवार असताना देखील अजित पवार यांच्या राष्ट्रवादी काँग्रेसचे ज्येष्ठ नेते, आमदार नरहरी झिरवाळ यांनी महाविकास आघाडीचे उमेदवार संदीप गुळवे यांना जाहीर पाठिंबा दर्शविला आहे. झिरवाळ यांनी घेतलेल्या या भूमिकेमुळे राजकीय निरीक्षकांच्या भुवया उंचावल्या आहे.
नरहरी झिरवाळ महायुतीचे आमदार आहेत. तर संदीप गुळवे ठाकरे गटाचे शिक्षक मतदार संघाचे उमेदवार आहेत. झिरवाळ यांचा आज वाढदिवस आहे. वाढदिवसानिमित्त संदीप गुळवे यांनी झिरवाळ यांची भेट घेतली होती. त्यावेळी झिरवाळ यांनी गुळवेंना जाहीर पाठींबा दिला आहे. झिरवाळ यांच्याकडून संदीप गुळवे यांना आगळंवेगळं रिटर्न गिफ्ट मिळाल्यामुळे गुळवे आणि त्यांच्या कार्यकर्त्यांमधील उत्साह वाढला आहे.
झिरवाळ यांनी आपल्या सर्व कार्यकर्त्यांना संदीप गुळवे यांचं काम करण्याच्या सूचना दिल्या आहेत. तसेच, संदीप गुळवे यांना आपला जाहीर पाठींबा असल्याची घोषणाच नरहरी झिरवाळ यांनी केली आहे. तसेच, कौटुंबिक संबंधांमुळे संदीप गुळवेंना पक्षीय गणित बाजूला ठेवून पाठिंबा देतोय असं नरहरी झिरवाळ यांनी म्हटलं आहे.
काय घडलं भेटीत…
शिक्षक मतदारसंघाचे उमेदवार संदीप गुळवे यांनी नरहरी झिरवाळ यांची भेट घेतली. वाढदिवसाच्या शुभेच्छा देत दोन्ही नेत्यांमध्ये काही वेळ बंद दाराआढ चर्चा झाली. यावेळी संदीप गुळवे यांच्यासोबत काँग्रेसचे आमदार हिरामण खोसकर देखील उपस्थित होते. भेटीनंतर झिरवाळ यांनी संदीप गुळवे यांना जाहीर पाठींबा दिला. त्यानंतर आपल्या सर्व कार्यकर्त्यांना संदीप गुळवे यांचं काम करण्याच्या सूचना नरहरी झिरवाळ यांनी दिल्या.
