रविवार ३० जून
वंचित बहुजन आघाडीच्या प्रवक्तेपदी सहा जणांच्या निवडी जाहीर करण्यात आल्या आहेत. यात नुकतीच शिर्डी लोकसभा निवडणूक लढविलेल्या उत्कर्षा रुपवते यांचा समावेश करण्यात आला आहे.
वंचित बहुजन आघाडीचे अध्यक्ष ॲड. प्रकाश आंबेडकर यांनी वंचितच्या प्रवक्त्यांची यादी जाहीर केली. यात रूपवते यांच्यासह दिशा पिंकी शेख, अरुण जाधव, सिद्धार्थ मोकळे व तय्यब जाफर यांचा समावेश आहे.
रुपवते यांनी शिर्डी लोकसभा मतदारसंघाची निवडणूक लढवत तब्बल ९० हजारावर मते मिळविली. सुरुवातीला काँग्रेसकडून निवडणूक लढविण्यास इच्छुक असलेल्या रूपवते यांच्यासाठी महाविकास आघाडीकडून ही जागा सुटू शकली नाही. माजी खासदारांना पुन्हा उद्धव ठाकरे यांनी शिवसेनेचे प्रवेश देत त्यांना उमेदवारी जाहीर केल्यानंतर रूपवते यांनी वंचितमध्ये प्रवेश केला होता.
मात्र निवडणुकीत त्यांना पराभवाला सामोरे जावं लागलं. त्यामुळे वंचितकडून आता त्यांच्यावर प्रवक्तेपदाची महत्त्वाची जबाबदारी सोपविण्यात आली आहे.
पक्षाची ध्येयधोरणे प्रसारमाध्यांमातून लोकांपर्यंत पोहोचविण्याचा प्रामाणिक प्रयत्न करणार…
श्रद्धेय बाळासाहेब आंबेडकर यांनी माझ्यावर विश्वास दाखवत माझी वंचित बहुजन आघाडीच्या प्रवक्तेपदी नियुक्ती केली. याबद्दल त्यांचे व प्रदेशाध्यक्षा रेखाताई ठाकूर यांचे खूप खूप आभार. संविधानातील तत्वांशी बांधिलकी राखत वंचित बहुजन आघाडी पक्षाची ध्येयधोरणे प्रसारमाध्यांमातून लोकांपर्यंत पोहोचविण्याचा प्रामाणिक प्रयत्न मी जबाबदारीने करेन व पक्षाने माझ्यावर दाखवलेला विश्वास सार्थ करेन. – उत्कर्षा रुपवते.
