शुक्रवार, ०९ ऑगस्ट
दूधगंगा नागरी सहकारी पतसंस्थेच्या सुमारे ८१ कोटी रुपयांच्या अपहार प्रकरणात आरोप पत्र दाखल झाल्यानंतर पहिल्याच तारखेला आरोपी भाऊसाहेब कुटेने न्यायालयात नियमित जामिनासाठी अर्ज दाखल करतानाच माझ्याविरुद्ध सक्षम पुरावा नसल्याने मला आरोपातून मुक्त करण्याची मागणी केली आहे. या दोन्ही अर्जांवर न्यायालयाने सरकारी वकिलांचे म्हणणे मागविले आहे.
दरम्यान गुरुवारी (८ ऑगस्ट) न्यायालयीन कोठडीत असलेल्या भाऊसाहेब गुंजाळ व भाऊसाहेब कुटे या दोघांसह लहानु गणपत कुटे, उत्तम शंकर लांडगे, उल्हास रावसाहेब थोरात, सोमनाथ कारभारी सातपुते व अमोल प्रकाश क्षीरसागर हे आरोपी न्यायालयात उपस्थित होते.
भाऊसाहेब कुटेच्यावतीने न्यायालयात ॲड. राहुल जामदार यांनी वकीलपत्र दाखल केले असून आरोपीला नियमित जामीन मिळावा तसेच फौजदारी प्रक्रिया संहिता कलम २२७ अन्वये डिस्चार्ज अर्ज जिल्हा व अतिरिक्त सत्र न्यायाधीश वाय. पी. मनाठकर यांच्या न्यायालयात दाखल करण्यात आला आहे.
तसेच या खटल्यातील अन्य एक आरोपी, सध्या जामिनावर असलेल्या अमोल प्रकाश क्षीरसागर याने देखील फौजदारी प्रक्रिया संहिता कलम २२७ अन्वये डिस्चार्ज अर्ज न्यायालयात दाखल केला असून या सर्व अर्जांवर न्यायाधीश मनाठकर यांनी सरकारी वकिलांचे म्हणणे मागविले आहे. त्यानंतर न्यायालयाकडून या अर्जांवर निर्णय दिला जाणार आहे.
