महाराष्ट्र संवाद न्यूज
नाशिक-पुणे महामार्गावर शुक्रवारी (१७ जानेवारी) सकाळी झालेल्या तीन वाहनांच्या भीषण अपघातामध्ये नऊ जणांचा करुण अंत झाला आहे. तर सात जण गंभीर जखमी झाले असून मृतांचा आकडा आणखी वाढण्याची शक्यता वर्तवली जात आहे.
नाशिकमधील दुर्दैवी घटनेत आत्तापर्यंत आठ जणांचा मृत्यू झाला. आता त्या पाठोपाठ नारायणगाव जवळ झालेल्या या अपघातामुळे महाराष्ट्र हळहळला आहे. एसटी बस, ट्रक आणि मॅक्झिमो व्हॅनमध्ये हा मोठा अपघात झाला.
देबुबाई दामू टाकळकर (वय ६५ वर्ष, रा. वैशखखेडे ता. जुन्नर जि. पुणे), विनोद केरूभाऊ रोकडे (वय ५० वर्ष, रा. कांदळी ता. जुन्नर जि. पुणे), युवराज महादेव वाव्हळ (वय २३ वर्ष, रा. १४ नंबर कांदळी ता. जुन्नर जि. पुणे), चंद्रकांत कारभारी गुंजाळ (वय ५७ वर्ष, रा. कांदळी ता. जुन्नर जि. पुणे), गीता बाबुराव गवारे (वय ४५ वर्षे, रा. कांदळी ता. जुन्नर जि. पुणे), भाऊ रभाजी बडे (वय ६५ वर्ष, रा. नगदवाडी कांदळी, ता. जुन्नर जि. पुणे), नजमा अहमद हनीफ शेख (वय ३५ वर्ष, रा. गडही मैदान खेड राजगुरुनगर), वशिफा वशिम इनामदार (वय ५ वर्ष), मनीषा नानासाहेब पाचरणे (वय ५६ वर्षे, रा. १४ नंबर ता. जुन्नर, जि. पुणे) अशी मृतांची नावे समोर आली आहे.
प्राप्त झालेल्या माहितीनुसार, पुणे-नाशिक महामार्गावरील नारायणगावजवळ तीन वाहनांमध्ये भीषण अपघात झाला. सकाळी दहा वाजण्याच्या सुमारास ही भयंकर घटना घडली. सुरुवातीला प्रवासी वाहतूक करणाऱ्या मॅक्स ऑटो गाडीला पाठीमागून आयशर टेम्पोने जोराची धडक दिली. ही धडक इतकी जोरदार होती की चेंडूप्रमाणे ही मॅक्स ऑटो फेकली गेली आणि पुढे एका ब्रेक फेल झालेल्या बसवर आदळली.
या भयंकर अपघातात चार महिला, चार पुरुष आणि एका बाळाचा दुर्दैवी अंत झाला. तर अपघातात सात जण गंभीर जखमी झाले असून त्यांच्यावर नारायणगाव येथे खासगी रुग्णालयात उपचार सुरु आहेत. मृतांचा आकडा वाढण्याचीही भिती वर्तवली जात आहे.
https://x.com/Dev_Fadnavis/status/1880152051268665773?t=zvaASRiWMvEfFNZmwdPi8Q&s=19
सरकारकडून पाच लाखांची मदत… दरम्यान, या अपघातप्रकरणी मुख्यमंत्री देवेंद्र फडणवीस यांनी शोक व्यक्त करत मृतांच्या नातेवाईकांना शासकीय मदत जाहीर केली आहे. पुणे-नाशिक महामार्गावर नारायणगावजवळ झालेल्या भीषण अपघातात ९ जणांचा मृत्यू झाल्याची घटना अतिशय दुर्दैवी आहे. मी त्यांना भावपूर्ण श्रद्धांजली अर्पण करतो. त्यांच्या कुटुंबियांच्या दुःखात आम्ही सहभागी आहोत. जखमींच्या प्रकृतीत लवकर सुधारणा व्हावी, अशी प्रार्थना करतो. मृतांच्या वारसांना ५ लाख रुपये आर्थिक सहाय्य मुख्यमंत्री सहायता निधीतून करण्यात येईल. जखमींच्या उपचाराची योग्य काळजी घ्या, असे पुणे पोलिस अधीक्षकांना सांगितल्याचे मुख्यमंत्री म्हणालेत. 
