पुणे-नाशिक महामार्गावरील चंदनापुरी घाटात आर्टिका इर्टिका कारचा भीषण अपघात; एका युवतीचा जागीच मृत्यू, चार प्रवासी गंभीर

महाराष्ट्र संवाद न्यूज ऑनलाईन-

पुणे-नाशिक राष्ट्रीय महामार्गावर संगमनेर तालुक्यातील चंदनापुरी घाटात गुरुवारी दुपारी एक अत्यंत दुर्दैवी आणि भीषण अपघात घडला. पुण्याहून नाशिकच्या दिशेने जाणाऱ्या एका भरधाव इर्टिका कारचा ताबा सुटल्याने कार थेट रस्ता दुभाजकाला (डिव्हायडर) जाऊन धडकली. या अपघातात कर्नाटकातील एका २४ वर्षीय युवतीचा जागीच मृत्यू झाला असून कारमधील इतर चार प्रवासी गंभीर जखमी झाले आहेत.

मिळालेल्या माहितीनुसार, कर्नाटकातील होन्नाली आणि नाईक कुटुंब हे इर्टिका कारने (क्र. KA 29 B 8777) पुण्याहून नाशिकच्या दिशेने प्रवास करत होते. गुरुवारी दुपारी चंदनापुरी घाट सुरू होताच चालकाचे गाडीवरील नियंत्रण सुटले आणि भरधाव कार रस्ता दुभाजकाला जाऊन वेगाने धडकली. धडक इतकी प्रचंड होती की कार पलटी होऊन रस्त्याच्या कडेला असलेल्या साईड गटारामध्ये जाऊन कोसळली. या भीषण धडकेत कारचा पूर्णपणे चक्काचूर झाला आहे.

या अपघातात अर्पिता भीमआप्पा नाईक (वय २४, रा. मुदलगी, जिल्हा बेळगाव, कर्नाटक) या युवतीचा जागीच दुर्दैवी मृत्यू झाला. तर कारमधील रोहन होन्नाली, अभिषेक नाईक, सुरज होन्नाली आणि बसय्या नेलुर हे चार जण गंभीर जखमी झाले आहेत.

अपघाताची माहिती मिळताच डोळासने महामार्ग पोलीस केंद्राचे सहाय्यक पोलीस निरीक्षक रावसाहेब बांबळे आणि पोलीस कर्मचारी अजय आठरे यांनी पथकासह तातडीने घटनास्थळी धाव घेतली. महामार्ग पोलीस आणि स्थानिक नागरिकांनी तातडीने बचावकार्य राबवून कारमध्ये अडकलेल्या जखमींना बाहेर काढले आणि उपचारासाठी संगमनेर येथील खाजगी रुग्णालयात दाखल केले. मृत अर्पिता नाईक हिचा मृतदेह उत्तरीय तपासणीसाठी संगमनेरच्या कुटीर रुग्णालयात पाठवण्यात आला.

अपघातामुळे महामार्गावरील वाहतूक काही काळ विस्कळीत झाली होती, परंतु पोलिसांनी अपघातग्रस्त वाहन क्रेनच्या साहाय्याने बाजूला करून वाहतूक पूर्ववत सुरू केली. या प्रकरणी घारगाव पोलीस ठाण्यात अपघाताची नोंद करण्यात आली असून पोलीस पुढील तपास करत आहेत.