महाराष्ट्र संवाद न्यूज ऑनलाईन-
संगमनेरच्या समृद्ध साहित्यिक आणि सांस्कृतिक परंपरेला नवा आयाम देणाऱ्या अत्याधुनिक कवी अनंत फंदी बंदिस्त नाट्यगृहाचे लोकार्पण सोमवारी (दिनांक २३ नोव्हेंबर) सायंकाळी ७ वाजता होणार आहे. माजी महसूलमंत्री बाळासाहेब थोरात आणि आमदार सत्यजित तांबे यांच्या प्रमुख उपस्थितीत हा सोहळा पार पडणार असून, अखिल भारतीय मराठी नाट्य परिषदेचे अध्यक्ष व ज्येष्ठ अभिनेते प्रशांत दामले यांच्या नाट्यप्रयोगांनी या नूतनीकरण झालेल्या रंगमंचाची तिसरी घंटा वाजणार आहे, अशी माहिती नगराध्यक्ष डॉ. मैथिलीताई तांबे यांनी दिली.
संगमनेर नगरपरिषदेच्या माध्यमातून उभारण्यात आलेल्या या एक हजार आसन क्षमतेच्या अद्ययावत वास्तूमुळे शहरातील नाट्यरसिकांमध्ये उत्साहाचे वातावरण निर्माण झाले आहे. या लोकार्पण सोहळ्याला माजी आमदार डॉ. सुधीर तांबे, दुर्गाताई तांबे, डॉ. जयश्रीताई थोरात यांच्यासह सर्व माजी नगराध्यक्ष, नगरसेवक आणि शहरातील मान्यवर उपस्थित राहणार आहेत.
या प्रकल्पाबाबत माहिती देताना डॉ. मैथिलीताई तांबे म्हणाल्या की, माजी नगराध्यक्ष दुर्गाताई तांबे यांच्या कार्यकाळात या बंदिस्त नाट्यगृहाच्या कामाला सुरुवात झाली होती. त्यानंतर आमदार सत्यजित तांबे यांनी सातत्याने पाठपुरावा करून राज्यातील विविध नाट्यगृहांचा अभ्यास केला आणि त्यातील सर्वोत्तम आधुनिक सुविधांचा समावेश या वास्तूत केला आहे.
संगमनेरला कवी अनंत फंदी यांच्यापासून शाहीर विठ्ठल उमप, कांताबाई सातारकर आणि पद्मश्री रघुवीर खेडकर यांसारख्या दिग्गज कलावंतांची मोठी परंपरा लाभली आहे. लोकनेते बाळासाहेब थोरात यांच्या नेतृत्वाखाली येथील कलावंतांना नेहमीच हक्काचे व्यासपीठ मिळाले असून, हे नवे नाट्यगृह तालुक्याच्या सांस्कृतिक चळवळीला अधिक बळकटी देईल.
नाट्यगृहाच्या उद्घाटनानिमित्त दोन दिवस दर्जेदार नाट्यप्रयोगांचे आयोजन करण्यात आले आहे. सोमवारी (दि. २३) रात्री ८ वाजता ‘शिकायला गेलो एक’, तर मंगळवारी (दि. २४) रात्री ८ वाजता ‘एका लग्नाची पुढची गोष्ट’ या प्रशांत दामले यांच्या गाजलेल्या नाटकांचे प्रयोग सादर होणार आहेत. या दोन्ही नाटकांच्या तिकीट विक्रीतून जमा होणारी संपूर्ण रक्कम दुष्काळग्रस्तांच्या मदतीसाठी ‘दुष्काळ निधी’ला सुपूर्द केली जाणार असल्याची महत्त्वपूर्ण घोषणा आमदार सत्यजित तांबे यांनी केली आहे.
या ऐतिहासिक सोहळ्याला नागरिक व रसिकांनी मोठ्या संख्येने उपस्थित राहावे, असे आवाहन उपनगराध्यक्ष नूर मोहम्मद शेख, सर्व नगरसेवक, नगरसेविका आणि मुख्याधिकारी डॉ. दयानंद गोरे यांनी केले आहे.
तालुका स्तरावरील सर्वात अद्ययावत नाट्यगृह ठरणार
राज्याला आणि देशाला अनेक नामवंत कलाकार देणाऱ्या संगमनेर शहरात उभे राहिलेले कवी अनंत फंदी नाट्यगृह हे तालुका स्तरावरील अत्यंत वैभवशाली आणि अद्ययावत नाट्यगृह ठरणार आहे. एक हजार आसन क्षमता, भव्य रंगमंच, आधुनिक प्रकाशयोजना (लाईट डेकोरेशन), सुसज्ज प्रेक्षक गॅलरी आणि प्रशस्त पार्किंग अशा सर्व सुविधांनी युक्त असलेली ही वास्तू संगमनेरचा सांस्कृतिक मानबिंदू ठरेल.- आमदार सत्यजित तांबे.






