मुंबईत सोमवारी झालेल्या एका अपघात प्रकरणी माजी खासदारावर गुन्हा दाखल करण्यात आला आहे. खार पश्चिम मध्ये झालेल्या या अपघातात एकाचा मृत्यू झाला होता तर एक महिला गंभीर जखमी झाली होती.
मुंबईतील खार पश्चिम येथील सीडी रोड-16 वा रोड जंक्शनवर २८ सप्टेंबरच्या सायंकाळी झालेल्या एका भीषण अपघातात बीएमसी कर्मचारी अय्यप्पन सेल्वराज हरिजन (४१) यांचा मृत्यू झाला, तर त्यांची पत्नी नॅन्सी (३७) गंभीर जखमी झाल्या. ७१ वर्षीय माजी खासदार आणि निवृत्त ब्रिगेडियर सुधीर सावंत यांच्या भरधाव इर्टिगा कारने अय्यप्पन यांच्या दुचाकीला पाठीमागून जोरदार धडक दिल्याने हा अपघात घडला.
या अपघाताचा थरार सीसीटीव्ही कॅमेऱ्यात कैद झाला असून त्याचा व्हिडिओ सोशल मीडियावर व्हायरल झाला आहे. अपघातानंतर अय्यप्पन कारखाली अडकल्याने स्थानिकांनी कार उचलून त्यांना बाहेर काढले, मात्र उपचारादरम्यान त्यांचा मृत्यू झाला. या घटनेत आणखी एका स्कूटीचालकाच्या हाताला फ्रॅक्चर झाले आहे. घटनेनंतर सावंत यांचा रक्तदाब वाढल्याने त्यांच्यावर रुग्णालयात उपचार सुरू आहेत.
या प्रकरणी खार पोलिसांनी सावंत यांची कार जप्त केली असून त्यांच्याविरोधात बीएनएस कलम १०६(१) आणि मोटार वाहन कायद्यानुसार गुन्हा दाखल केला आहे. सावंत हे १९९१ ते १९९६ दरम्यान काँग्रेसचे राजापूर मतदारसंघातील खासदार होते.
