नाशिक – बांगलादेशी नागरिकांसह रोहिंग्यांना बनावट कागदपत्राच्या आधारे जन्म दाखल्यांचे वितरण केल्याचा खळबळजनक आरोप भाजप नेते किरीट सोमय्या यांनी केल्यानंतर सरकारने यासाठी नेमलेल विशेष तपास पथक (एसआयटी) तीन दिवसापासून तळ ठोकून चौकशी करत असतानाच आता राज्य सरकारने मोठी कारवाई केली आहे. मालेगावचे तत्कालीन तहसीलदार व सध्या जळगाव जिल्ह्यात बोदवड येथे कार्यरत असलेले नितीनकुमार देवरे, मालेगावचे नायब तहसीलदार संदीप धारणकर यांच्यासह पाच जणांवर निलंबनाचा बडगा उगारला आहे.
निलंबन करण्यात आलेल्यांमध्ये तहसीलदार नितीन कुमार देवरे, नायब तहसीलदार संदीप धारणकर यांच्यासह मालेगाव तहसील कार्यालयातील लिपिक विजय अंभोरे, रेहान शेख तसेच अव्वल कारकून भरत शेवाळे यांचा समावेश आहे. तहसीलदार, नायब तहसीलदारांचे निलंबन राज्य सरकारने केले असून उर्वरित तिघा कर्मचाऱ्यांचे निलंबन जिल्हाधिकारी कार्यालयाने केले आहे.
केंद्रीय गृहमंत्री अमित शहा आज शुक्रवारी (२४ जानेवारी) नाशिक दौऱ्यावर आहेत. या दौऱ्या दरम्यान ते या संदर्भातील आढावा घेणार असल्याची माहिती समोर येत आहे. तत्पूर्वीच राज्य सरकारने ही कारवाई केली आहे. भाजपचे नेते किरीट सोमय्या यांनी आपल्या एक्स अकाउंट वरून माहिती देताना या कारवाईचे स्वागत केले.
३९७७ जन्म प्रमाणपत्र बनावट कागदपत्राच्या आधारे – मालेगाव शहर व तालुक्यात बांगलादेशी नागरिकासह रोहिंग्यांना बनावट कागदपत्राच्या आधारे जन्म प्रमाणपत्राचे वाटप केले जात असल्याचा आरोप सोमय्या यांनी केला होता. मालेगाव शहरातून ३९७७ जन्म प्रमाणपत्र हे बरोबर कागदपत्रांच्या आधारे दिले गेल्याचे त्यांच्या एक्स अकाउंट वर म्हटले आहे.
एसआयटी चौकशी – दोन दिवसांपूर्वी स्वभाव यांनी मुख्यमंत्री फडणवीस यांना पत्र देत चौकशी होईपर्यंत जन्म दाखले वितरित करण्याची प्रक्रिया थांबविण्याची मागणी केली होती. त्यानुसार राज्य सरकारने तातडीने आदेश काढून सदर प्रक्रिया थांबवली. गेल्या तीन दिवसापासून एसआयटीचे पथक मालेगावमध्ये तळ ठोकून या संदर्भात चौकशी करत आहे.
निलंबन काळात देवरे जळगाव जिल्हाधिकारी कार्यालयात – सोमय्या यांनी मालेगावमध्ये येऊन कागदपत्रांचे तपासणी करताना छावणी पोलीस ठाण्यात तक्रार दिला होता. मुख्यमंत्री देवेंद्र फडणवीस यांनी या प्रकरणाचे गांभीर्य लक्षात घेत यासाठी एसआयटीची स्थापना केली होती. एसआयटी पथकातील अधिकारी ज्यांना जन्म प्रमाणपत्र देण्यात आले त्यांच्या घरी जाऊन कागदपत्राची पडताळणी करत असतानाच महसूल विभागाने गुरुवारी (२३ जानेवारी) मालेगावचे तत्कालीन व सध्या बोदवड येथे कार्यरत असलेले तहसीलदार नितीनकुमार देवरे यांच्यासह सध्याचे नायब तहसीलदार संदीप धारणकर यांच्यावर निलंबनाची कारवाई केली. या दोघांची विभागीय चौकशी लावण्यात आली आहे. निलंबन काळात देवरे यांचे मुख्यालय जळगाव जिल्हाधिकारी कार्यालयात तर धारणकर यांचे मुख्यालय नाशिक जिल्हाधिकारी कार्यालयात ठेवण्यात आले आहे.
