संगमनेर, दि. २० फेब्रुवारी –
आयशर टेम्पो चालकाचे टेम्पो वरील नियंत्रण सुटल्याने टेम्पो रस्त्याच्या कडेला असलेल्या घराची भिंत तोडून घरात घुसला. घरात घुसलेल्या टेम्पोमुळे मध्यरात्रीच्या सुमारास झोपेत असलेले अख्खे कुटुंबीय बचावले असले तरी गंभीर जखमी झाले आहे. जखमी कुटुंबीयांवर खाजगी रुग्णालयात उपचार सुरू आहेत.
मंगळवारी मध्यरात्री बारा वाजेच्या दरम्यान संगमनेर तालुक्यातील घुलेवाडी येथील ग्रामीण रुग्णालयासमोर ही अपघाताची घटना घडली. मनोहर विठ्ठल थोरात (वय ९९), राजू मनोहर थोरात (वय ५८), जुली राजू थोरात (वय ४८), सायली राजू थोरात (वय १९) व सॅम्युवेल राजू थोरात (वय १७) अशी जखमींची नावे आहेत.
मध्यरात्रीच्या वेळी आयशर चालक त्याच्या ताब्यातील आयशरवरील (MH 17 CV 1110) भरधाव वेगाने घेऊन जात असताना नासिक-पुणे महामार्गालगत असलेल्या घुलेवाडी गावातील ग्रामीण रुग्णालयासमोरून जात असताना चालकाचा अचानक आयशरवरील ताबा सुटला.
आणि अनपेक्षितपणे आयशर समोर असलेल्या घराच्या भिंतीला धडक देत मोठा आवाज करत घरात घुसला. यावेळी घरामध्ये झोपेत असलेले विठ्ठल मनोहर थोरात यांचे कुटुंबीय भिंतीखाली दबले गेल्यामुळे जखमी झाले. आवाजामुळे जाग्या झालेल्या परिसरातील नागरिकांनी जखमींना रुग्णालयात हलविले. अपघातात घराचे मोठे नुकसान झाले.
दरम्यान वाहनचालक मध्याच्या नशेत असल्याची माहिती समोर येत आहे. रात्री उशिरापर्यंत या संदर्भात शहर पोलीस ठाण्यात कोणताही गुन्हा दाखल करण्यात आलेला नव्हता. संगमनेर शहर पोलीस ठाण्याचे पोलीस निरीक्षक रवींद्र देशमुख यासंदर्भात पुढील तपास करत आहे.
