संगमनेर, दि. २३ फेब्रुवारी
नगरपालिका हद्दीतील अवैध बांधकामे व अवैध कत्तलखान्यांविरोधात हाती घेण्यात आलेल्या अतिक्रमण हटाव मोहिमेमध्ये अतिक्रमण हटवितांना असे काही समोर आढळले की त्यामुळे पोलिसांनी स्वतः फिर्यादी होत संबंधितांविरोधात गुन्हा दाखल केला आहे.
गुरुवारी (२० फेब्रुवारी) संगमनेर नगर परिषदेचे मुख्याधिकारी त्याचा प्रशासक रामदास कोकरे यांच्या मार्गदर्शनाखाली शहरातील काही कत्तलखान्यांचे अतिक्रमण निष्काशीत करण्याची कारवाई करण्यात आली. नगरपालिकेचे प्रशासन अधिकारी प्रल्हाद देवरे, उपनगर अभियंता महेश गोर्डे, अल्ताफ शेख, भीमाशंकर वर्पे, जयराम मंडलिक, पंकज मुंगसे यांच्यासह पालिकेच्या कर्मचाऱ्यांचे पथक व संगमनेरचे पोलीस उपअधीक्षक डॉ. कुणाल सोनवणे, पोलीस निरीक्षक रवींद्र देशमुख यांच्या नेतृत्वाखालील पोलीस पथक संयुक्तरित्या अवैध बांधकामे व बेकायदेशीर कत्तलखान्याचे बांधकामे पाडण्याचे काम करत होते.
जमजम कॉलनीमधील अवैध कत्तलखान्याचे अतिक्रमण काढून पथक मौलाना आझाद मंगल कार्यालयामागील रमाई गार्डन शेजारी असलेल्या गुलाम हुसेन कुरेशी यांचे अवैध अतिक्रमण काढत असताना पथकाला गोवंश जनावरांचे कुजलेले अवशेष आढळून आले. त्यामुळे पोलीस उपअधीक्षक कुणाल सोनवणे यांच्या आदेशावरून तात्काळ या कुजलेल्या अवस्थेतील तब्बल चारशे किलो वजनाच्या या अवशेषाचा पंचनामा करण्यात आला.
लॅब तपासणीसाठी या गोवंश अवशेषाचे काही नमुने ताब्यात घेत उर्वरित सर्व अवशेष जेसीबीच्या सहाय्याने खड्डा घेऊन जमिनीत नष्ट करण्यात आले. सदरचे शेड हे गुलाम हुसेन कुरेशी याच्या मालकीचे असल्याने त्याला तात्काळ नोटीस देत शेड काढून टाकण्यास सांगण्यात आले.
तसेच संगमनेर शहर पोलीस ठाण्यात पोलीस शिपाई अतुल दिनकर उंडे यांनी दिलेल्या फिर्यादीवरून आरोपी गुलाम हुसेन कुरेशी याच्या विरोधात राज्यात गोवंश जनावरांच्या कत्तलीस मनाई असताना गोवंश जातीच्या जनावरांची कत्तल करून त्यांचे कुजलेले अवशेष पत्राच्या शेडमध्ये ठेवले असल्याने भारतीय न्याय संहिता कलम २७१, ३२५ सह महाराष्ट्र पशुसंवर्धन सुधारणा अधिनियम १९९५ चे कलम ५(क), ९ प्रमाणे गुन्हा दाखल करण्यात आला आहे. पुढील तपास पोलीस हवालदार असे करत आहे.
