महाराष्ट्र संवाद न्यूज – मुंबई
पुण्यातील दीनानाथ मंगेशकर रुग्णालयाच्या हलगर्जीपणामुळे झालेल्या तनिषा भिसे यांच्या मृत्यूप्रकरणी राज्य सरकारने कठोर पाऊल उचलले आहे. या प्रकरणी डॉ. सुश्रुत घैसास यांच्यावर गुन्हा दाखल करण्याचे निर्देश पोलीस आयुक्तांना देण्यात आले आहेत, तर दीनानाथ मंगेशकर रुग्णालयाला १० लाख रुपयांचा दंड ठोठावण्यात आला आहे. यासोबतच, धर्मादाय रुग्णालयांमध्ये रुग्णांकडून अनामत रक्कम घेण्यास मनाई करणारी कायदेशीर तरतूद करण्याचा प्रस्ताव राज्य सरकारने तयार केला आहे.
उच्चपदस्थ अधिकाऱ्यांनी दिलेल्या माहितीनुसार, भिसे प्रकरणानंतर धर्मादाय रुग्णालयांसाठीच्या नियमावलीत मोठे बदल प्रस्तावित करण्यात आले असून, याबाबतचे आदेश लवकरच जारी केले जातील. नवीन नियमांनुसार, धर्मादाय म्हणून नोंदणीकृत असलेल्या सर्व रुग्णालयांमधील रुग्णसेवा पूर्णपणे ऑनलाईन करावी लागेल. त्याचे केंद्रीय स्तरावर व्यवस्थापन मुख्यमंत्री धर्मादाय कक्षाच्या माध्यमातून केले जाईल. या रुग्णालयांना रुग्णांकडून कोणत्याही प्रकारची अनामत रक्कम घेता येणार नाही. तसेच, रुग्णालयांनी त्यांच्या एकूण निधीपैकी १० टक्के रक्कम गरीब रुग्णांसाठी वापरली आहे किंवा नाही, याचा नियमित हिशेब धर्मादाय आयुक्तांकडे सादर करणे बंधनकारक असेल.
वैद्यकीय शिक्षण विभागाने दीनानाथ रुग्णालयाची चौकशी केल्यानंतर डॉ. घैसास आणि संबंधित व्यक्तींवर गुन्हा दाखल करण्याचे निर्देश देण्यात आले. राष्ट्रीय वैद्यकीय परिषदेच्या (इंडियन मेडिकल कौन्सिल) नियमांचे उल्लंघन केल्यामुळे डॉ. घैसास आणि इतर कर्मचाऱ्यांवर कारवाई करण्याची शिफारस करण्यात आली आहे. दीनानाथ रुग्णालयाला लावण्यात आलेल्या १० लाख रुपयांच्या दंडाच्या रकमेतून तनिषा भिसे यांच्या दोन मुलींच्या नावे प्रत्येकी पाच लाख रुपयांच्या मुदत ठेवी केल्या जातील आणि त्या मुली सज्ञान झाल्यावर त्यांना ही रक्कम मिळेल.
भिसे कुटुंबीयांची महाराष्ट्र वैद्यकीय परिषदेत सुनावणी:
तनिषा भिसे मृत्यू प्रकरणी सोमवारी महाराष्ट्र वैद्यकीय परिषदेच्या (एमएमसी) कार्यालयात सुनावणी झाली. या वेळी भिसे कुटुंबीयांनी आपली बाजू मांडली. पुणे पोलिसांनी डॉ. सुश्रुत घैसास यांना हजर राहण्याचे आदेश दिले असले तरी, ते गैरहजर राहिल्याने त्यांना पुढील सुनावणीसाठी बोलावण्यात येणार आहे. सुनावणीदरम्यान, मृत महिलेच्या कुटुंबीयांनी घडलेली संपूर्ण घटना चौकशी समितीसमोर कथन केली. त्यानुसार, गर्भवती महिलेवर रुग्णालयात करण्यात आलेल्या उपचारांसंबंधीचा अहवाल रुग्णालयाकडून मागविण्यात येणार आहे.
