पुणे:
मुळशीचे तत्कालीन तहसीलदार रणजित भोसले यांना अखेर निलंबित करण्यात आले आहे. सात-बारा उताऱ्यावरील ‘द टाटा पॉवर कंपनी लि.’चे नाव कमी करून त्याऐवजी धोंडू गोपाल ढोरे यांचे नाव मालकी हक्कात दाखल करण्याचा आदेश दिल्याप्रकरणी त्यांच्यावर ही कारवाई करण्यात आली आहे. या अनियमिततेप्रकरणी राज्य सरकारने सोमवारी निलंबनाचे आदेश जारी केले असून, ते जिल्हाधिकारी कार्यालयाला प्राप्त झाले आहेत.
या प्रकरणी कंपनीने उच्च न्यायालयात याचिका दाखल केली होती. उच्च न्यायालयाने महाराष्ट्र जमीन महसूल अधिनियम १९६६ च्या कलम १४१, १४० आणि १५५ नुसार, भोसले यांनी गेल्या वर्षी ऑक्टोबरमध्ये नाव कमी करण्याचा दिलेला आदेश रद्द केला होता. उच्च न्यायालयाच्या दणक्यानंतर या अनियमिततेची चौकशी अतिरिक्त विभागीय आयुक्तांमार्फत करण्यात आली. या चौकशीचा अहवाल २९ एप्रिल रोजी सरकारला सादर करण्यात आला होता, यात अनियमितता झाल्याचा निष्कर्ष काढण्यात आला होता.
शासकीय कर्तव्ये पार पाडताना गुणवत्ता व औचित्य न ठेवल्याने तसेच महाराष्ट्र नागरी सेवा (वर्तणूक) नियम १९७९ नुसार उल्लंघन केल्याने तहसीलदार भोसले यांच्याविरोधात विभागीय चौकशीची कारवाई करण्यात येणार आहे. महसूल विभागाचे अवर सचिव प्रवीण पाटील यांनी भोसले यांच्या निलंबनाचे आदेश जारी केले आहेत.
