नदीपात्रात वाहून गेलेल्या विजय कुटेचा मृतदेह चौथ्या दिवशी सापडला; शहरावर शोककळा

संगमनेर – 

गणेश चतुर्थीच्या पूर्वसंध्येला प्रवरा नदीत वाहून गेलेल्या विजय संभाजी कुटे (वय ४२, रा. रंगार गल्ली) यांचा मृतदेह आज, शुक्रवारी सकाळी तब्बल चौथ्या दिवशी संगमनेर तालुक्यातील खराडी गावाजवळ नदीपात्रात आढळून आला. या घटनेने रंगार गल्ली आणि चव्हाणपुरा परिसरात शोककळा पसरली आहे.

गणेश चतुर्थीच्या पूर्वसंध्येला, मंगळवारी रात्री ९ ते १० च्या सुमारास ही दुर्दैवी घटना घडली होती. विजय कुटे हे नेहमीप्रमाणे सिद्धकला हॉस्पिटलमध्ये सुरक्षारक्षक म्हणून कामावर जात असताना, संगमनेर खुर्दकडे जाणाऱ्या प्रवरा नदीच्या छोट्या पुलावरून नदीत फुले टाकत होते. याच वेळी त्यांचा तोल जाऊन ते नदीच्या प्रवाहात वाहून गेले.

कुटुंबीयांनी त्यांचा शोध घेतला, मात्र ते सापडले नाहीत. त्यानंतर प्रशासनाने आणि स्थानिक नागरिकांनी त्यांचा शोध घेण्यासाठी अहोरात्र प्रयत्न केले. ड्रोनद्वारेही शोध मोहीम राबवण्यात आली होती. नदीला पाण्याचा प्रवाह मोठा असल्याने शोध घेण्यात अडथळे येत होते, यामुळे तीन दिवसांपासून त्यांची कोणतीही माहिती मिळत नव्हती.

अखेर आज सकाळी साडेअकराच्या सुमारास नदीपात्रात एका शेताजवळ एका व्यक्तीचा मृतदेह स्थानिक नागरिकांना आढळला. त्यांनी तात्काळ प्रशासनाला माहिती दिली. रेस्क्यू टीम आणि प्रशासकीय अधिकारी घटनास्थळी पोहोचले आणि त्यांनी मृतदेह ताब्यात घेतला. त्यानंतर रुग्णवाहिकेद्वारे तो घुलेवाडी येथील शासकीय कुटीर रुग्णालयात पुढील कारवाईसाठी पाठवण्यात आला. तिथे मृत व्यक्तीची ओळख पटली.

विजय कुटे हे सिद्धकला हॉस्पिटलमध्ये सुरक्षारक्षक म्हणून काम करत होते. त्यांच्या पश्चात आई-वडील, पत्नी, मुलगा आणि मुलगी असा परिवार आहे. हालाखीच्या परिस्थितीतून गेलेल्या त्यांच्या कुटुंबावर या दुर्दैवी घटनेने मोठा आघात झाला आहे. संगमनेर शहर पोलीस निरीक्षक रवींद्र देशमुख यांच्या मार्गदर्शनाखाली पुढील तपास सुरू आहे.