महाराष्ट्र संवाद न्यूज ऑनलाईन- अहिल्यानगरच्या राजकीय, सहकार आणि कृषी क्षेत्रातील ज्येष्ठ नेते तसेच संदीप उद्योग समूहाचे संस्थापक भानूदास एकनाथ कोतकर यांचे वयाच्या ७४ व्या वर्षी हृदयविकाराच्या झटक्याने निधन झाले. छातीत त्रास जाणवू लागल्याने त्यांना अहिल्यानगर येथील आनंदऋषीजी हॉस्पिटलमध्ये दाखल करण्यात आले होते. मात्र, उपचारादरम्यान त्यांची प्राणज्योत मालवली. त्यांच्या निधनाने अहिल्यानगर शहरासह संपूर्ण जिल्ह्यात शोककळा पसरली आहे.
भानूदास कोतकर यांनी आपल्या राजकीय कारकिर्दीची सुरुवात केडगावचे सरपंच म्हणून केली होती. त्यानंतर त्यांनी नगर पंचायत समितीचे सभापती, कृषी उत्पन्न बाजार समितीचे सभापती, मुंबई कृषी उत्पन्न बाजार समितीचे संचालक, नगर तालुका काँग्रेसचे अध्यक्ष आणि अहिल्यानगर शहर जिल्हा काँग्रेसचे अध्यक्ष यांसारख्या अनेक महत्त्वाच्या पदांवर काम केले. कृषी उत्पन्न बाजार समितीच्या नूतनीकरणात आणि विकासात त्यांनी मोलाचे योगदान दिले. त्यांच्याच पुढाकारातून नेप्ती उपबाजार समितीची निर्मिती झाली, तर चिचोंडी पाटील येथे उपबाजार समितीसाठी जागा उपलब्ध करून देण्यात आली.
राजकारणासोबतच उद्योग आणि सहकार क्षेत्रातही त्यांचा मोठा दबदबा होता. ते माजी महापौर संदीप कोतकर यांचे वडील, तर माजी महापौर सुवर्णा कोतकर यांचे सासरे होत. तसेच दिवंगत माजी मंत्री शिवाजीराव कर्डिले आणि दिवंगत माजी आमदार अरुणकाका जगताप यांचे ते व्याही होते. त्यांच्या निधनाने जिल्ह्यातील राजकीय व कृषी क्षेत्रातील एका अत्यंत प्रभावशाली आणि ज्येष्ठ व्यक्तिमत्त्वाची कारकीर्द संपुष्टात आली आहे.
त्यांच्या अंत्यसंस्काराची वेळ आणि ठिकाण लवकरच निकटवर्तीयांकडून घोषित केले जाणार आहे.
