महाराष्ट्र संवाद न्यूज ऑनलाईन- संगमनेर तालुक्यातून अत्यंत वेदनादायी आणि धक्कादायक बातमी समोर आली आहे. भारतीय जनता पक्षाच्या कायदा सेलचे जिल्हा संयोजक आणि नामांकित विधिज्ञ अमित धुळगंड यांचे बुधवारी सकाळी हृदयविकाराच्या तीव्र झटक्याने दुर्दैवी निधन झाले.
नाशिक जिल्ह्यातील मनमाडनजीक असलेल्या ऐतिहासिक अंकाई गडावर दर्शनासाठी गेले असताना त्यांच्यावर काळानं घाला घातला. या आकस्मिक घटनेमुळे मांडवे बुद्रुक गावावर शोककळा पसरली असून राजकीय, सामाजिक आणि विधी क्षेत्रातून मोठी हळहळ व्यक्त केली जात आहे.
मिळालेल्या सविस्तर माहितीनुसार, ॲड. अमित धुळगंड हे धार्मिक वृत्तीचे असल्याने बुधवारी भल्या पहाटे अंकाई गडावर दर्शनासाठी गेले होते. अत्यंत उत्साहात गड चढून वर गेल्यानंतर त्यांना अचानक अस्वस्थ वाटू लागले आणि हृदयविकाराचा तीव्र झटका आला. गड माथ्यावरच त्यांची प्राणज्योत मालवली. या दुर्दैवी घटनेची माहिती मिळताच त्यांच्या मित्रपरिवारासह सहकाऱ्यांना मोठा धक्का बसला.
ॲड. अमित धुळगंड यांनी वकिलीच्या क्षेत्रात स्वतःचा एक वेगळा ठसा उमटवला होता. कायदेशीर बाबींवर त्यांचे प्रभुत्व होतेच, शिवाय भारतीय जनता पक्षाच्या कायदा सेलचे जिल्हा संयोजक म्हणून ते पक्षसंघटनेत योगदान देत होते. राज्याचे पालकमंत्री राधाकृष्ण विखे पाटील आणि संगमनेरचे आमदार अमोल खताळ यांचे एकनिष्ठ व खंदे कार्यकर्ते म्हणून त्यांची राजकीय वर्तुळात विशेष ओळख होती.
केवळ वकिली आणि राजकारण पुरते मर्यादित न राहता सामाजिक, धार्मिक आणि शैक्षणिक उपक्रमांत त्यांचा नेहमीच सक्रिय सहभाग असायचा. आपल्या मनमिळाऊ आणि कार्यतत्पर स्वभावामुळे संगमनेर तालुक्यासह संपूर्ण जिल्ह्यात त्यांचा मोठा जनसंपर्क होता. जनसेवेची आवड असलेला एक सक्रिय विधिज्ञ आणि उमदा राजकीय कार्यकर्ता असा अचानक निघून गेल्याने संगमनेरसह मांडवे बुद्रुक परिसरात शोककळा पसरले.
