महाराष्ट्र संवाद न्यूज ऑनलाईन- स्पर्धा परीक्षांची तयारी करणाऱ्या २५ वर्षीय तरुणीने राहत्या खोलीत गळफास घेऊन आत्महत्या केल्याचा प्रकार उघडकीस आला आहे. मयुरी सुनील मखरे असे या दुर्दैवी आत्मघात केलेल्या तरुणीचे नाव आहे. या घटनेमुळे श्रीगोंदा शहर परिसर तसेच स्पर्धा परीक्षेची तयारी करणाऱ्या विद्यार्थ्यांमध्ये प्रचंड हळहळ व्यक्त केली जात आहे.
मिळालेल्या माहितीनुसार, मयुरी मखरे ही श्रीगोंदा शहरातील कन्या विद्यालय परिसरात एका अभ्यासिकेतून महाराष्ट्र लोकसेवा आयोग (MPSC) आणि पोलीस भरतीची सातत्याने तयारी करत होती. रविवारी १८ ऑक्टोबर रोजी राहत्या खोलीत लोखंडी अँगलला नायलॉनच्या दोरीने गळफास घेतलेल्या अवस्थेत ती आढळली.
हा संपूर्ण प्रकार खोलीमालकाच्या निदर्शनास आल्यानंतर त्यांनी तात्काळ तिला खाली उतरवून उपचारासाठी डॉ. हिरडे यांच्याकडे नेले. त्यानंतर पुढील उपचारासाठी रुग्णवाहिकेतून श्रीगोंदा ग्रामीण रुग्णालयात दाखल करण्यात आले, मात्र वैद्यकीय तपासणीनंतर डॉक्टरांनी तिला मृत घोषित केले.
या प्रकरणी नातेवाईक उमेश मखरे यांनी दिलेल्या खबरीवरून श्रीगोंदा पोलीस ठाण्यात आकस्मिक मृत्यूची नोंद करण्यात आली आहे. घटनेची माहिती मिळताच पोलिसांनी तात्काळ घटनास्थळी भेट देऊन पाहणी केली. तरुणीने हे टोकाचे पाऊल नेमके कोणत्या कारणामुळे उचलले, याबाबतचे स्पष्ट कारण अद्याप समोर आलेले नाही. या प्रकरणाचा पुढील सखोल तपास पोलीस उपनिरीक्षक वाघमारे करत आहेत.
