संगमनेर पोलीस प्रशासनाचा मोठा निर्णय विसर्जन मिरवणुकीच्या या मार्गावर पूर्णतः डीजे बंदी, उल्लंघन झाल्यास वाहनासह डीजे जप्त करणार

संगमनेर – 

संगमनेरच्या गणेश विसर्जन मिरवणुकीसाठी पोलीस प्रशासनाने मोठा निर्णय घेतला आहे. विसर्जन मिरवणूक मार्गावरील गवंडीपुरा मशीद ते नगरपालिका चौकापर्यंत डीजे वाजविण्यावर पूर्णतः बंदी घालण्यात आली आहे. शहर पोलीस निरीक्षक रवींद्र देशमुख यांनी एका पत्रकाद्वारे ही माहिती दिली.

श्रीरामपूरचे अपर पोलीस अधीक्षक सोमनाथ वाघचौरे यांच्या अधिपत्याखाली गणेशोत्सवाच्या पार्श्वभूमीवर शांतता समितीचे बैठक घेण्यात आली होती. या बैठकीला गणेश मंडळाचे पदाधिकारी, प्रतिष्ठित नागरिक, सामाजिक संस्थांचे प्रतिनिधी आणि शांतता समितीचे सदस्य उपस्थित होते. या बैठकीमध्ये लेझरवर बंदी घातल्यानंतर डीजेचा मुद्दा उपस्थित झाला होता. मिरवणुकीमध्ये डीजेच्या अतिवापरामुळे ध्वनी प्रदूषण होते, तसेच कायदा व सुव्यवस्थेचा प्रश्न निर्माण होतो, यावर बैठकीत चर्चा करण्यात आली.

त्यानंतर गणेश प्रतिष्ठापनेच्या दिवशी अनेक गणेशोत्सव मंडळाच्या मिरवणुकीत मोठ्या प्रमाणात डीजेचा दणदणदणाट झाल्याने मिरवणूक मार्गावर असलेल्या मेनरोडवरील व्यापारी व रहिवासी नागरिकांनी मेनरोडने डीजे नेण्यास व वाजवण्यास हरकत घेत या संबंधीचे निवेदन प्रांताधिकारी व पोलीस अधिकाऱ्यांना देण्यात आले होते.

या निवेदनाच्या अनुषंगाने पोलीस प्रशासनाने गवंडीपुरा मशीद ते नगरपालिका चौकापर्यंत डीजे वाजविण्यावर पूर्णतः बंदी घातली आहे. विसर्जन मिरवणुकी दरम्यान कोणत्याही गणेश मंडळाने या मार्गावर डीजे वाजवत आदेशाचे उल्लंघन केल्यास डीजेसह संबंधित वाहन जप्त करण्यात येणार आहे. शांततापूर्ण आणि सुरक्षित गणेशोत्सव साजरा करण्यासाठी सर्वांनी सहकार्य करावे, असे आवाहन पोलिस प्रशासनाने केले आहे.