गणेशोत्सव आणि ईद-ए-मिलादच्या पार्श्वभूमीवर जिल्ह्यात लेझर लाईट, प्रेशर हॉर्न आणि कार्बन डायऑक्साइड वायूच्या वापरावर बंदी!

अहिल्यानगर – 

गणेशोत्सव आणि ईद-ए-मिलादच्या पार्श्वभूमीवर अहिल्यानगर जिल्ह्यात कायदा व सुव्यवस्था राखण्यासाठी जिल्हाधिकारी डॉ. पंकज आशिया यांनी महत्त्वाचा आदेश जारी केला आहे. भारतीय नागरिक सुरक्षा संहिता २०२३ च्या कलम १६३ (१) नुसार मिळालेल्या अधिकारांचा वापर करून, त्यांनी जिल्ह्यात लेझर लाईट, प्रेशर हॉर्न (दबाव हॉर्न) आणि कार्बन डायऑक्साइड वायूच्या वापरावर ८ सप्टेंबरपर्यंत पूर्णपणे बंदी घातली आहे.

हा आदेश बुधवारपासून (३ सप्टेंबर) लागू झाला आहे आणि तो ८ सप्टेंबर २०२५ पर्यंत अमलात राहणार आहे. मिरवणुकांमध्ये काही मंडळांकडून मोठ्या प्रमाणावर वापरल्या जाणाऱ्या या वस्तूंमुळे ज्येष्ठ नागरिक, लहान मुले आणि आजारी व्यक्तींच्या आरोग्याला गंभीर धोका निर्माण होऊ शकतो.

या साधनांच्या वापरामुळे श्वसन संस्थेला हानी पोहोचणे, हृदयाचे ठोके वाढणे, कानाच्या पडद्याला तसेच लहान मुलांच्या डोळ्यांना कायमचे नुकसान होण्याची शक्यता आहे. यामुळे सार्वजनिक शांतता आणि सुरक्षिततेला बाधा पोहोचू शकते, असेही जिल्हा प्रशासनाने स्पष्ट केले आहे.

या आदेशाचे उल्लंघन करणाऱ्यांवर कठोर कारवाई केली जाईल, असा इशाराही जिल्हा प्रशासनाने दिला आहे. नागरिकांनी शांततापूर्ण वातावरणात सण साजरे करावेत, असे आवाहनही करण्यात आले आहे.