जुन्नर (पुणे):
पुणे जिल्ह्यातील जुन्नर तालुक्यातील अहिल्यानगर-कल्याण महामार्गावर आज मंगळवारी सकाळी हृदयद्रावक घटना घडली आहे. डुंबरवाडी गावच्या हद्दीतील हॉटेल अभिजित जवळ मजुरांनी भरलेली पिकअप आणि ट्रक यांच्यात झालेल्या भीषण समोरासमोर धडकेत दोन मजुरांचा जागीच मृत्यू झाला असून, १५ ते २० जण गंभीर जखमी झाले आहेत. या अपघातामुळे महामार्गावर रक्ताचा सडा पडला होता आणि परिसरात मोठी खळबळ उडाली आहे.
मिळालेल्या सविस्तर माहितीनुसार, आज मंगळवारी (दिनांक ३० डिसेंबर) सकाळी नऊ वाजेच्या सुमारास मजुरांचे पिकअप वाहन ओतूरकडून आळेफाट्याच्या दिशेने जात होते. याच वेळी आळेफाटा बाजूकडून ओतूरच्या दिशेने येणाऱ्या भरधाव ट्रकने पिकअपला जोरदार धडक दिली. ही धडक इतकी भीषण होती की पिकअपचा अक्षरशः चक्काचूर झाला असून, त्यातील मजूर रस्त्यावर फेकले गेले. या अपघातात दोन जणांचा दुर्दैवी मृत्यू झाला असून एका मजुराची प्रकृती अद्याप चिंताजनक आहे.
अपघाताची माहिती मिळताच परिसरातील नागरिकांनी मदतीसाठी धाव घेतली. तात्काळ ओतूर पोलीस स्टेशनचे कर्मचारी आणि डुंबरवाडी टोल नाक्याचे कर्मचारी घटनास्थळी दाखल झाले. स्थानिक नागरिकांच्या मदतीने पोलिसांनी जखमींना वाहनातून बाहेर काढून तातडीने ओतूर आणि आळेफाटा येथील विविध रुग्णालयांमध्ये उपचारासाठी दाखल केले आहे. जखमींपैकी काहींची प्रकृती गंभीर असल्याने मृतांचा आकडा वाढण्याची भीती व्यक्त केली जात आहे.
या भीषण अपघातामुळे महामार्गावरील वाहतूक काही काळ पूर्णपणे ठप्प झाली होती. मात्र, महामार्ग प्रशासनाने क्रेनच्या साहाय्याने अपघातग्रस्त वाहने रस्त्यावरून बाजूला हटवली असून आता वाहतूक सुरळीत करण्यात आली आहे. भरधाव वेग आणि नियंत्रणाबाहेर गेलेली वाहने यामुळे हा अपघात घडल्याचा प्राथमिक अंदाज व्यक्त केला जात आहे. ओतूर पोलीस याप्रकरणी अधिक तपास करत असून मृतांची ओळख पटवण्याचे काम सुरू आहे.
