संगमनेर, प्रतिनिधी-
येणाऱ्या मकर संक्रांतीच्या सणाच्या पार्श्वभूमीवर शहरात पतंगबाजीचा उत्साह वाढत असला तरी, नायलॉन मांजाचा धोका पुन्हा एकदा ऐरणीवर आला आहे. या जीवघेण्या नायलॉन मांजाची विक्री व वापरावर शहरात कडक बंदी घालून दोषींवर गुन्हे दाखल करावेत, या मागणीसाठी ‘राहुल गांधी समर्थक संघाच्या’ (RGSS) वतीने संगमनेर नगर परिषदेचे मुख्याधिकारी देविदास गोरे, पोलीस निरीक्षक समीर बारवकर यांना सविस्तर निवेदन देण्यात आले.
RGSSने दिलेल्या निवेदनात पुढे म्हटले आहे की, नायलॉन मांजा हा प्लास्टिक मिश्रित आणि अविघटनशील असल्याने तो सहजासहजी तुटत नाही. दुचाकीवरून प्रवास करणाऱ्या नागरिकांच्या गळ्याला हा मांजा अडकून गंभीर दुखापत होण्याच्या किंवा मृत्यू होण्याच्या घटना दरवर्षी घडत असून मानवी जीव धोक्यात आला आहे. केवळ माणसेच नव्हे, तर आकाशात उडणारे मुके पक्षीही या मांजात अडकून जायबंदी होतात किंवा मृत्युमुखी पडतात. पर्यावरणाच्या दृष्टीनेही हा मांजा अत्यंत घातक असून तो अनेक वर्षे निसर्गात तसाच राहत असल्याने प्रदूषणाचा मोठा धोका निर्माण झाला आहे.
सर्वोच्च न्यायालय आणि राष्ट्रीय हरित लवादाने (NGT) नायलॉन मांजाच्या विक्रीवर आणि वापरावर देशभरात बंदी घातली असली, तरीही शहरात छुप्या पद्धतीने याची विक्री होत असल्याचे निवेदनात नमूद करण्यात आले आहे. यावर नियंत्रण मिळवण्यासाठी प्रशासनाने तातडीने शहरातील पतंग विक्रीच्या दुकानांची तपासणी करून नायलॉन मांजा जप्त करावा, तसेच विक्रेत्यांवर आणि वापरणाऱ्या व्यक्तींवर कठोर कायदेशीर कारवाई करून गुन्हे दाखल करावेत अशी मागणी करण्यात आली आहे.
यासोबतच, नगर परिषदेने शहरात ध्वनिक्षेपकाद्वारे किंवा फलकांद्वारे जनजागृती करावी आणि ऑनलाईन पद्धतीने होणाऱ्या नायलॉन मांजाच्या विक्रीवरही लक्ष ठेवून त्यावर नियंत्रण मिळवावे, अशी आग्रही मागणी संघाने केली आहे. प्रशासनाने या विषयाचे गांभीर्य ओळखून त्वरित पावले उचलली नाहीत, तर नागरिकांच्या सुरक्षिततेचा प्रश्न गंभीर होईल, असा इशाराही यावेळी देण्यात आला.
निवेदन देताना राम अरगडे, प्रकाश कडलग, अरुण चव्हाण, अमोल शेलकर, अरुण जाधव, रवींद्र हासे, कल्याण जोर्वेकर, प्रवीण हासे, सतीश खताळ, शंतनू भालेकर, मोहसीन शेख यांसह संघटनेचे अन्य पदाधिकारी उपस्थित होते.
