पोलिसांची मोठी कारवाई: कत्तलीसाठी चालवलेल्या गोवंशासह तिघांना पकडले; ८ लाखांचा मुद्देमाल जप्त

महाराष्ट्र संवाद न्यूज ऑनलाईन | शिर्डी:

राज्यात गोवंश हत्याबंदी कायदा लागू असतानाही अत्यंत निर्दयपणे कत्तलीच्या उद्देशाने गोवंशाची वाहतूक करणाऱ्या दोन पिकअप वाहनांवर शिर्डी पोलिसांनी धाडसी कारवाई केली. सावळीविहीर जवळ सापळा रचून केलेल्या या कारवाईत पोलिसांनी ६ जनावरांची सुटका केली असून, एकूण ८ लाख २२ हजार रुपयांचा मुद्देमाल जप्त केला आहे. याप्रकरणी तीन आरोपींना अटक करण्यात आली आहे.

गंगापूरच्या दिशेने गोवंशाची बेकायदेशीर तस्करी होत असल्याची गोपनीय माहिती जिल्हा पोलीस अधीक्षक मुम्मका सुदर्शन यांना मिळाली होती. त्यांच्या सूचनेनुसार उपविभागीय अधिकारी अमोल भारती आणि पोलीस निरीक्षक रणजित गलांडे यांच्या मार्गदर्शनाखाली पोलीस पथकाने सावळीविहीर परिसरात पाळत ठेवून सापळा रचला.

यावेळी गंगापूरच्या दिशेने जाणाऱ्या दोन महिंद्रा पिकअप वाहनांना (क्रमांक एमएच २१ एक्स ६९५३ आणि एमएच २० डीई ७८२२) पोलिसांनी अडवून त्यांची तपासणी केली. या दोन्ही वाहनांमध्ये अत्यंत दाटीवाटीने आणि निर्दयपणे भरलेली ६ गोवंश जनावरे व वासरे आढळून आली. पोलिसांनी तत्परता दाखवत सर्व जनावरांची सुटका केली. या कारवाईत २ लाख २२ हजार रुपये किमतीची जनावरे आणि ६ लाख रुपये किमतीची दोन वाहने, असा एकूण ८ लाख २२ हजार रुपयांचा मुद्देमाल जप्त करण्यात आला आहे.

याप्रकरणी पोलिसांनी सलीम महम्मद सय्यद (वय ५०, रा. रांजणगाव), हरीभाऊ दशरथ गायके (वय ४६, रा. धानेगाव) आणि अमीर मुन्नील सय्यद (वय २६, रा. रांजणगाव, सर्व ता. गंगापूर) या तिघांना ताब्यात घेऊन अटक केली आहे. पोलीस कर्मचारी प्रल्हादसिंग सुदर्डे यांनी दिलेल्या फिर्यादीवरून आरोपींविरुद्ध ‘महाराष्ट्र पशुसंरक्षण अधिनियम’ आणि प्राण्यांना निर्दयतेने वागवण्यास प्रतिबंध करणाऱ्या कायद्यान्वये गुन्हा दाखल करण्यात आला आहे. पुढील तपास शिर्डी पोलीस करत आहेत.