समृद्धी महामार्गावर भीषण अपघात: जोर्वे येथील रावसाहेब काकड यांचा मृत्यू; शरदनाना थोरात यांच्यासह तिघे जखमी, प्रकृती स्थिर

संगमनेर | मोहसीन शेख 
मुंबईवरून संगमनेरकडे परतत असताना समृद्धी महामार्गावर नागपूर कॅरीडोरवर रविवारी रात्री २ वाजेच्या सुमारास कारचा टायर फुटल्याने भीषण अपघात झाला. या अपघातात संगमनेर तालुक्यातील जोर्वे येथील रावसाहेब रेवजी काकड यांचा जागीच मृत्यू झाला आहे. तर तालुक्यातील प्रतिष्ठित व्यक्ती शरद नाना थोरात, विनोद गिरी आणि चालक गंभीर जखमी झाले आहेत.
मिळालेल्या माहितीनुसार, जोर्वे येथील हे सर्वजण स्विफ्ट गाडीने मुंबईहून संगमनेरकडे परतत होते. रात्री दोन वाजेच्या सुमारास समृद्धी महामार्गावर घोटीच्या जवळ आले असता अचानक गाडीचा टायर फुटला. टायर फुटल्याने चालकाचे वाहनावरील नियंत्रण सुटले आणि गाडीला भीषण अपघात झाला. हा अपघात इतका तीव्र होता की, गाडीमधील रावसाहेब रेवजी काकड यांचा जागीच मृत्यू झाला. तर वाहन चालकासह गाडीत असलेले शरद नाना थोरात व विनोद गिरी हे जखमी झाले.
अपघाताची माहिती मिळताच महामार्ग पोलिसांनी आणि स्थानिक प्रशासनाने तातडीने घटनास्थळी धाव घेऊन मदतकार्य सुरू केले. जखमींना तात्काळ घोटी येथील एसएमबीटी (SMBT) हॉस्पिटलमध्ये उपचारासाठी दाखल करण्यात आले आहे. सुदैवाने जखमींची प्रकृती आता स्थिर असून त्यांच्यावर डॉक्टरांच्या देखरेखीखाली उपचार सुरू असल्याची माहिती मिळाली आहे.
दरम्यान, अपघाताचे वृत्त समजताच वंचित बहुजन आघाडीचे नेते अजिज ओहरा यांच्यासह अनेकांनी घोटीच्या एसएमबीटी रुग्णालयात धाव घेतली. या धक्कादायक घटनेमुळे जोर्वे गावासह संपूर्ण संगमनेर तालुक्यात मोठी खळबळ उडाली असून, रावसाहेब काकड यांच्या अचानक जाण्याने सर्वत्र तीव्र शोककळा पसरली आहे.