महाराष्ट्र संवाद न्यूज ऑनलाईन
संगमनेर:
घुलेवाडी ग्रामीण रुग्णालयातील बेफिकीर आणि ढिसाळ कारभाराचा प्रत्यक्ष अनुभव आल्यानंतर शिवसेना शहरप्रमुख विनोद सूर्यवंशी यांनी रुग्णालय प्रशासनावर तीव्र संताप व्यक्त केला आहे. प्रशासनाने यात सुधारणा न केल्यास शिवसेनेच्या वतीने घुलेवाडी ग्रामीण रुग्णालयासमोर तीव्र लोकआंदोलन छेडण्यात येईल, असा इशाराही त्यांनी दिला आहे. रुग्णालयाच्या निष्काळजीपणामुळे सर्वसामान्य नागरिकांचे आरोग्य धोक्यात आले असून हा प्रकार तात्काळ थांबवावा, अशी मागणी त्यांनी केली आहे.
विनोद सूर्यवंशी हे आपल्या लहान बाळाला अँटी रेबीज लसीकरणासाठी रुग्णालयात घेऊन गेले असता, तेथे आरोग्य सेवेचा पुरता बोजवारा उडाल्याचे त्यांच्या निदर्शनास आले. बालरोग विभागातील तज्ज्ञ डॉक्टर न्यायालयीन कामकाजाचे कारण सांगून गैरहजर होते, यामुळे अनेक पालक आपल्या आजारी मुलांना घेऊन तासनतास ताटकळत बसले होते. धक्कादायक बाब म्हणजे, तज्ज्ञ डॉक्टर नसल्यामुळे इतर विभागातील डॉक्टरांकडून लहान मुलांवर उपचार केले जात होते. तज्ज्ञ नसलेल्या डॉक्टरांकडून बालकांवर उपचार होणे ही अत्यंत गंभीर बाब असून, हा मुलांच्या जीवाशी खेळ असल्याचा आरोप सूर्यवंशी यांनी केला.
याशिवाय, रुग्णालयाचे मुख्य प्रभारी डॉ. जऱ्हाड हे कायमच संपर्काबाहेर असतात आणि फोन उचलत नाहीत, अशा तक्रारी नागरिकांनी केल्या आहेत. शासन ग्रामीण भागातील आरोग्यासाठी कोट्यवधींचा निधी खर्च करत असताना, काही डॉक्टरांच्या निष्काळजीपणामुळे गरिबांना साध्या उपचारांसाठी त्रास सहन करावा लागत आहे. त्यामुळे जिल्हा शल्यचिकित्सक आणि वरिष्ठ आरोग्य अधिकाऱ्यांनी या प्रकरणाची तात्काळ चौकशी करून दोषींवर कठोर कारवाई करावी आणि रुग्णालयाची सेवा सुरळीत करावी, अशी मागणी सूर्यवंशी यांनी केली आहे. 
