संगमनेरमधील ‘मेडीकव्हर’चा काळा धंदा चव्हाट्यावर! महात्मा फुले योजनेच्या नावाखाली लाच मागणारे ‘रॅकेट’ लाचलुचपतच्या जाळ्यात, दोघांवर गुन्हा दाखल!

महाराष्ट्र संवाद न्यूज ऑनलाईन
संगमनेर | अनंत पांगारकर
गरीब आणि गरजूंना मोफत वैद्यकीय उपचार मिळावेत यासाठी शासनाने सुरु केलेल्या ‘महात्मा फुले जन आरोग्य योजने’चा संगमनेरमधील मेडीकव्हर हॉस्पिटलने साफ बट्ट्याबोळ चालवला आहे. गोरगरिबांच्या आरोग्याचा खेळ खंडोबा करत त्यांच्याकडून उघडपणे लाचेची उकळपटी करणाऱ्या मेडीकव्हर हॉस्पिटलमधील दोन बड्या धटिंगणांचा खरा चेहरा आता समोर आला आहे. रुग्णाच्या आईवर उपचार करण्यासाठी आणि तिचे ऑपरेशन या योजनेतून करून देण्यासाठी तब्बल २० हजार रुपयांची लाच मागणाऱ्या डेटा एंट्री ऑपरेटर सुभाष धाडवड आणि त्याला खतपाणी घालणारा हॉस्पिटलचा मॅनेजर सुजित गायकवाड या दोघांच्या मुसक्या लाचलुचपत प्रतिबंधक विभागाने (ACB) आवळल्या असून संगमनेर शहर पोलीस ठाण्यात यांच्याविरोधात भ्रष्टाचार प्रतिबंधक कायद्यान्वये गुन्हा दाखल करण्यात आला आहे.
यातील धक्कादायक प्रकार असा की, महात्मा फुले योजनेअंतर्गत मोफत उपचार मिळणे हा रुग्णाचा हक्क असतानाही, आरोपी सुभाष धाडवड याने रुग्णाच्या नातेवाईकांकडे २० हजार रुपये लाचेची मागणी केली. एवढ्यावरच न थांबता, ही लाचेची रक्कम दिली नाही तर कसलेही बिल मिळणार नाही अशी धमकीवजा हुसकावणीही त्याने दिली.
संतापलेल्या तक्रारदाराने जेव्हा याबाबत हॉस्पिटलचा मॅनेजर सुजित गायकवाड याच्याकडे विचारणा केली, तेव्हा मदत करण्याऐवजी मॅनेजर महाशयांनी ‘जे ठरले आहे त्यात एक रुपयाही कमी होणार नाही’ असा दम भरत या लाचखोरीचे थेट समर्थन केले.
आरोग्यसेवेच्या नावाखाली सुरू असलेल्या या लुटमारीविरोधात तक्रारदाराने तातडीने लाचलुचपत प्रतिबंधक विभागाकडे धाव घेतली. अहिल्यानगर एसीबीच्या पथकाने २२ मे २०२५ रोजी केलेल्या लाच मागणी पडताळणीदरम्यान या दोन्ही आरोपींचा काळा कारभार आणि लाच मागितल्याचे निष्पन्न झाले. याप्रकरणी पोलीस उपनिरीक्षक छाया देवरे आणि त्यांच्या पथकाने ही कारवाई केली असून, पोलीस उपअधिक्षक अजित त्रिपुटे यांच्या मार्गदर्शनाखाली पुढील तपास सुरू आहे.
रुग्णांच्या परिस्थितीचा असा फायदा घेणाऱ्या आणि शासकीय योजनांचा बट्ट्याबोळ करणाऱ्या या लाचखोरांवर कठोर कारवाई करण्याची मागणी आता संगमनेर शहरातून जोर धरू लागली आहे.